Жалған схемамен алынған декреттік төлемдер мемлекетке қайтарылады

Фото: istockphoto.com

Министрлік мәліметінше, мамыр айының соңында декреттік төлем алу үшін жалған жұмысқа орналасу бойынша еліміздің 13 өңірінде 38 қылмыстық іс қозғалған. Мыңнан астам әйел іс фигуранты ретінде танылып, тоғыз іс бойынша сот үкім шығарған.

Ресми мәлімет бойынша, бүгінгі таңда мемлекетке келтірілген шығын көлемі шамамен 3 млрд теңгені құрайды.

«Әйелдердің сенімін пайдаланып, заңсыз схемаларға тартқан тұлғаларға баса назар аударылып отыр. Қазіргі таңда дәл осы адамдарға қатысты қылмыстық іс қозғалып, тергеу амалдары жүргізіліп жатыр», деді Виктория Шегай.

Қазақстанда декреттік төлемдерге бақылау күшейеді

Сонымен қатар ол заңсыз төлем алған әйелдердің мемлекетке қаражатты өтеуге міндетті екенін атап өтті. Вице-министрдің сөзінше, заңнамада рақымшылық жасау арқылы бұл міндеттемеден босату мүмкіндігі қарастырылмаған.

Еске сала кетейік, елімізде жұмыс істейтін аналарға бала 1,5 жасқа толғанға дейін әлеуметтік төлем төленеді. Оның мөлшері соңғы екі жылдағы орташа табыстың 40 пайызына тең. Мамыр айының басындағы дерек бойынша орташа төлем көлемі 86 062 теңгені құраған.