Жамбыл облысында 6 жасар бала ауруханада кенеттен көз жұмды: ажалы неден болды

Qazaq24.com, Sputnik.KZ дереккөзінен алынған мәліметтерге сүйене отырып ақпарат бөліседі..

АЛМАТЫ, 11 қазан - Sputnik. Жамбыл облысы Тұрар Рысқұлов ауданы Құлан ауылында 6 жастағы бала ауруханада көз жұмды. Баланың ажалы неден болды, оқиғаның мән-жайын Sputnik Қазақстан тілшісі біліп қайтты.

Құлан ауылында Жолшыбектер отбасы қара жамылды. Келінінен бір, немересінен екі айырылған Раушан апай еңірегенде етегі жасқа толып отыр.

"25 қыркүйектен бастап құса бастады. Біртіндеп үдеп кетті. 29 күні емханаға апарып ем, талон жоқ деді. Мен дәрігерлерге жедел түрде ауруханаға жатқызуды сұрадым. Бірақ олар жатқызбады", - дейді Әлидің әжесі Раушан Махамбетова.

Дәрігер ұсынған емнен баланың беті бері қарамаған. 30 күні учаскелік дәрігер алдына әжесі қайта барады.

"Барған сайын ауруханаға жатқызыңызшы деп сұраумен болдым. Немереме бір рет система қойылды. Ультра дыбыстық зерттеу, рентген жасалды. Нәтижесі таза деп шықты. Өт жолында болмашы бір ақау бар деді. Ауруханада үш күн жаттық", - дейді әжесі.

Деседе Әлидің жағдайы нашарлай берген.

"Ауруханада жатқанда басым ауырды деумен болды. Мен қайта-қайта дәрігерлерге бара бердім. Таң ата сағат 6:22-де Әликошым оянып, "апа, су берші" деді. Тамсанып тұрып суды ішті де, уф деп жүріп кетті", - дейді әжесі Раушан Махамбетова.

Раушан апайдың айтуынша, балаға дәрігерлер дұрыс қарамады. Дер кезінде көмек көрсетілгенде немерем аман қалар еді дейді ол.

Бұл отбасы екі жыл бұрын да қара жамылған. Ол кезде айы-күні жетіп отырған келіні, Әлидің анасы 22 жастағы Аяулым Әнуарбек ауруханада көз жұмды. Артында 3 баласы қалған. Әлидің нағашылары да аурухананы кінәлап отыр.

Әлидің анасы - Аяулым Әнуарбек

"Аяулымды ақылы ауруханаға қаратқанымызда тромб бар, Ана мен бала орталығында босану керек деді. Бірақ аудандық аурухана облысқа жібермей, соза берді. Жүктілік сегіз айға жеткенде қызымыз денсаулығы күрт нашарлап, ауруханаға жедел жәрдеммен жеткізіледі. 20 минутта қайтыс болып кетті. Енді жиенімізден айырылып отырмыз", - дейді марқұм келіншектің әпкесі Асылай Есенғали.

Ол кезде дәрігерге кінә тақпаған. Бірақ бұл жолы кешірмейміз дейді қара жамылған отбасы. Мән-жайды Sputnik Қазақстан тілшісі аурухананың бас дәрігері Дәулет Ахметбековтен де сұрап көрді.

"Баланың құсып қайтыс болуы деген мүмкін емес жағдай. Дәрігерлер заңды хаттама бойынша емдеген. Өзіміздің де төбемізден жай түскендей күйдеміз, қабырғамыз қайысып отырмыз. Қазіргі уақытта сот-медициналық сараптама жасалып жатыр, нәтижесінен кейін белгілі болады ", - дейді ол.

Қазіргі уақытта тергеу жүріп жатыр. Денсаулық сақтау басқармасы тарапынан арнайы жұмыс тобы құрылған. Медициналық және фармацевтикалық бақылау комитетіне ресми түрде хат жолданған.

Оқиғаларды жіберіп алмау үшін Qazaq24.com сайтынан ең өзекті жаңалықтарды қарап отырыңыз.