Жамбыл облысында мұғалім болғысы келген тұрғын директордың кабинетінің алдына тұз сепкен

АСТАНА, 13 қазан – Sputnik. Жамбыл облысы тұрғынына тұзбен жасалған "рәсім" үшін әкімшілік айыппұл салынды.

Жуалы аудандық соты ортақ пайдаланылатын орындарды ластау бойынша азаматшаға қатысты әкімшілік құқық бұзушылық туралы істі қарады.

Іс материалына сәйкес, ол орта мектептің дәлізінде және директордың кабинетінің алдына тұз шашқан. Айыпталушы өзінің түсініктемесінде мұғалім ретінде мектепке жұмысқа орналасқысы келгенін айтқан.

"Ол жұмысқа тұру мүмкін болмаған соң, тұзбен рәсім жасау арқылы қызметке кіремін деп ойлаған. Сотта азаматша жасаған ісіне өкініш білдіріп, өз кінәсін толық мойындап соттан қатаң жазаламауды сұрады", - делінген хабарламада.

Сот шешімімен айыпталушы кінәлі деп танылып, оған 27 мың теңге көлемінде әкімшілік айыппұл түрінде жаза тағайындалды.