Жақсылық жасау жауапкершілік

Egemen.KZ парақшасынан алынған ақпаратқа сәйкес, Qazaq24.com хабарлайды..

Қоғамда еріктілердің атқарып жүрген еңбегі орасан. Солардың бірі – Жанел Айыпова есімді жас ерікті үнемі ізгілікті істің басы-қасында жүреді. «Ерікті қызметім – еріккеннен емес, жастық жігеріммен жан-жағыма үлесімді қосқым келгенінен», дейді жас жанашыр. Жақсылық жасауды жауапкершілік деп қарайтын қаршадай ғана қыздың қажыр-қайратына жан-жағындағылар да таңырқай қарайды.

Қоғамның кемелденуі, ізгіліктің салтанат құруы ең алдымен азаматтардың әлеуметтік жауапкершілігіне байланысты ғой. Осы жауапкершілікті жастайынан сезініп, еріктілік қызметті қағидатына айналдырған жастардың қатары күн өткен сайын көбейіп келеді. Біз таныстырғалы отырған белсенді Жанел Аманжолқызы – Қарағанды облыстық «VolteQ» волонтерлік корпусындағы жетекші жастардың бірі.

Жанел 18 жаста. Қазіргі таңда ол «Шет тілдер колледжі» педагогикалық факультетінің 4-курс студенті. Жас болса да, волонтерлік қызметпен үш жылдан бері тұрақты айналысып жүр.

Еріктілікке нақты қадамы 2023 жылы Қарағанды облыстық «VolteQ» волонтерлік корпусына қосылған сәттен басталады. Дәл осы ортада ол волонтерліктің жүйелі, жоспарлы әрі нәтижеге бағытталған қызмет екенін түсінеді. Зооволонтерлікпен қатар әлеуметтік, экологиялық, мәдени және ивенттік бағыттардағы жобаларға араласа жүріп, ерікті болудың қоғамды өзгертудегі нақты құрал екенін ұғынды.

2017 жылдан бері жұмыс істеп келе жатқан «VolteQ» корпусы бүгінде облыстағы волонтерлік қозғалыстың маңызды тірегіне айналған. Корпус облыстық Жастар ресурстық орталығының қолдауымен жұмыс істеп, еріктілерге ұйымдастырушылық, мотивациялық және ынталандыру бағытында жан-жақты көмек көрсетеді. Мұнда әр волонтердің еңбегі ескеріліп, бастамалары қолдау табады.

Жанел қатысып жүрген негізгі жобалардың қатарында қарттарға қамқорлық көрсетуге бағытталған «Jas Qaria», жануарлар панажайларына көмек беретін «Tirshilik Ieleri», сондай-ақ емделуге мұқтаж жандарға қаржы жинауды көздейтін «JarmenQ» қайырымдылық жобасы бар. Бұл бастамалардың барлығы қоғамдағы нақты әлеуметтік мәселелерге бағытталғанымен құнды.

Ерекше атап өтерлігі – корпус волонтерлерінің авторлық жобалары да гранттық қолдауға ие болып отыр. Табиғатты қорғауға бағытталған «Sayahattime» жобасы экологиялық мәдениетті қалыптастыруға үлес қосса, «Bilim Bus» жобасы шалғай елді мекендердегі балалардың білім алу мүмкіндігін кеңейтуде. Бұл жобалар аясында қаржылық сауаттылық, жасанды интеллектіні пайдалану және базалық білім беру бағыттары қамтылған.

Былтырғы жыл Жанел үшін кәсіби әрі тұлғалық тұрғыдан маңызды кезең болды. Ол волонтерлік қызмет бойынша тренер атанып, Азаматтық бастамаларды қолдау орталығының бір миллион теңге көлеміндегі грантын жеңіп алды. Сонымен қоса, жануарларға жанашырлық көзқарас қалыптастыратын әңгімелерін кітап етіп шығарды.

Еңбегі ескерусіз емес. Жанел «Жыл волонтері – 2025» халықаралық сыйлығының «Жануарларды қорғау мәселелерін шешуге қосқан үлесі үшін» аталымы бойынша лауреаты атанды.

Қазір «JarmenQ» жобасы аясында Қарағанды қаласында қайырымдылық керуен-жәрмеңкесі ұйымдастырылып жатыр. Жаны ізгі Жанел сол шаруаның басы-қасында жүр. Игі іс-шара С.Сәпиев атындағы бокс орталығында өтіп, жиналған қаражат Арлан Түркенов есімді пациенттің еміне жұмсалады.

«Жанел әріптесіміз «VolteQ» волонтерлік корпусына келген күннен бастап-ақ белсенділігімен және жауапкершілігімен көзге түсті. Түрлі іс-шарада өзін кәсіби қырынан танытып, құнды тәжірибе жинақтады. Республикалық байқау шеңберінде ұйымдастырылған Зеренді волонтерлерді оқыту лагерінен өтіп, Ұлттық волонтерлік желі өткізген тренерлік оқуды сәтті аяқтады. Бүгінде спикерлік қабілеттерін одан әрі дамытып, жаңа белестерді бағындырып жүр. Жан-жануарларға арналған кітабы жарық көріп, кез келген жобаны жоғары деңгейде жүзеге асыра алатын, еріктілерді бір мақсатқа біріктіре білетін көшбасшы ретінде облысымыздың волонтерлік қозғалысына сүбелі үлес қосып келеді. Осы еңбегі еленіп, «VolteQ» волонтерлік корпусының жетекшісі қызметіне тағайындалды», дейді Қарағанды облысының волонтерлер фронт-офисінің басшысы Ардана Мырзанова.

Жанелдің пайым-парасаты «жауапкершілік пен жанашырлық адамды да, қоғамды да өзгертеді», дейді. Олай болса, жақсы іске жұмыла кететін жұдырықтай қыздың әр бастамасына сәттілік тілейміз.

Қарағанды облысы

Соңғы жаңалықтар