Жасанды интеллект шенеуніктердің қылмысын анықтады

АСТАНА, 14 қазан – Sputnik. Қаржы министрі Мәди Такиев жасанды интеллект бюджет қаржысын тиімді пайдалануға қалай көмектесіп жатқанын айтты, деп хабарлайды Sputnik Қазақстан тілшісі.

Қазіргі кезде бюджет қаражатын бақылауды күшейтейтін онлайн мониторинг енгізілді. Жасанды интеллект элементтерін қолданудың арқасында былтыр 307 млрд теңгенің күдікті төлемдері анықталса, биыл тоғыз айдың ішінде ондай төлемдердің жалпы көлемі 132 млрд теңгені құрады.

"Мәселен, аудандық білім бөлімдерінің қызметкерлеріне бір айда 65 млн теңгеге дейін төлем жасалған немесе 10 млн теңгеден астам сыйақы аударылған. Тағы бір мысал, бір шот немесе бір жеке сәйкестендіру нөмірін көрсете отырып, әр түрлі адамдардың аты-жөнімен айына 66 төлем жасалған", - деді Такиев үкіметтің бүгінгі отырысында.

Бұдан бөлек, онлайн мониторинг мемлекеттік қолдау жүйесінің жекелеген қатысушылары бюджет қаражатын мақсатына сай пайдаланбай отырғанын көрсетті. Атап айтқанда, кейбір ұйымдар қаржы институттары болмаса да, депозитке салып, пайда көрген. Осылайша, бір ұйым бөлінген 1 млрд теңге бюджеттік кредитті депозитке салу арқылы 80 млн теңге пайда түсірген. Бір мал басына 808 млн теңгеге бірнеше рет субсидия алу жағдайлары да бар.

Айта кетері, онлайн мониторинг жүйесі денсаулық сақтау, мәдениет, туризм және спорт салаларын да қамтиды.