ЖИ қазақстандықтар үшін жұмыс іздей бастайды

Қазақстанда азаматтарға лайықты бос жұмыс орындарын өз бетінше іздеудің қажеті болмайтын жаңа жұмысқа орналастыру моделі енгізіліп жатыр. Жүйе жұмысқа мұқтаж жандарды өзі анықтап, оларға қолайлы нұсқаларды ұсынады, деп хабарлайды Tengrinews.kz тілшісі.

Бұл туралы Үкімет отырысында Еңбек және халықты әлеуметтік қорғау министрі Асқарбек Ертаев мәлімдеді.

Оның айтуынша, министрлік цифрлық жұмыспен қамту қызметін енгізіп жатыр, оның негізгі мақсаты - жұмыспен қамтуды қамтамасыз етудің проактивті форматына көшу. Ведомство жұмыстың жаңа қағидасын "адам жұмыс іздемейді, жұмыс адамды табады" деп тұжырымдады.

Бұған дейін азаматтар порталдағы бос жұмыс орындарын өз бетінше қарап, мансап орталықтарына жүгінуге мәжбүр болатын. Енді жүйе жұмыс берушілердің қажеттіліктеріне сүйене отырып, жұмысқа орналасуды қажет етуі мүмкін азаматтарды өзі анықтайды.

Хабарламалар eGov мобильді қосымшасы, Enbek.kz порталы арқылы немесе 1414 нөмірінен SMS түрінде келеді. Бұл ретте жасанды интеллект адамның тұрғылықты аймағында ғана емес, одан тыс жерлерде де дербес бос жұмыс орындарын іріктейді. Оның ішінде жұмысшы мамандықтары да бар.

Бос жұмыс орындарынан бөлек, жүйе азаматтарға оқудан немесе қайта даярлаудан өтуді, сондай-ақ басқа өңірге қоныс аудару нұсқаларын қарастыруды ұсына алады. Сүйемелдеу жұмысқа тұрақты орналасқанға дейін жалғасады.

"Цифрлық сервистің пилоттық іске қосылуы шілде айында Павлодар облысында өтті. Осы кезеңде азаматтарға жұмысқа орналасу бойынша 39 000 SMS-ұсыныс жіберілді. Нәтижесінде 962 адам жұмыс тапты", - деді министр.

Ертаевтың айтуынша, қыркүйекте сервисті Маңғыстау облысында енгізу, ал жыл соңына дейін Қазақстанның барлық 20 өңіріне тарату жоспарланып отыр.

Сонымен қатар осыған ұқсас сервисті Aitu мобильді қосымшасында қолжетімді ету жоспарланған. Онда ЖИ-көмекші пайдаланушы үшін қолайлы бос жұмыс орындары мен оқу курстарын таңдап бере алады.

Тағы оқыңыз: 2,4 миллион сұрайды: Еңбекмин ең “қымбат“ мамандарды атады

Google News арқылы жаңалықтарымызды қадағалаңыз