ЖИ саласындағы жаңа жобалар

Азия-Тынық мұхиты инновациялар және технологиялар университеті мен Алматы Менеджмент университеті жасанды интеллект және цифрландыру бойынша бірлескен жобаларды қолға алады.

Куала-Лумпурда өткен кездесуде екі жоғары оқу орны өзара түсіністік туралы меморандумға қол қойды. Ынтымақтастық аясында студенттер мен оқытушылардың академиялық ұтқырлығын арттыру, сондай-ақ ортақ ғылыми-зерттеу бастамаларын жүзеге асыру жоспарланған. Сонымен қатар кездесуге қазақстандық өңірлік университеттердің басшылары қатысып, тәжірибе алмасу және инновациялық білім беру тәсілдерін енгізу мәселелерін талқылады.

Гүлнұр Тайқұлақова, ALMAU Экономика және қаржы мектебінің профессоры:

- Біз ғылыми-зерттеу жұмыстары аясында екі жоғары оқу орнының негізінде эксперименттік алаң құрып, ұзақ мерзімді серіктестікті дамытуға ниеттіміз. Меморандум бағдарламалық-нысаналы қаржыландыру бойынша гранттық жоба негізінде әзірленді. Осы жоба аясында қазір «Жасанды интеллект орталығы» жұмыс істейді. Алдағы уақытта орталық базасында бірлескен ғылыми жобалар мен қолданбалы зерттеулер жүзеге асырылады.

Хо Чин Куан, Азия-Тынық мұхиты технологиялар және инновациялар университетінің ректоры:

- Бүгінде жасанды интеллект саласының дамуы көп мемлекет үшін аса маңызды бағыт. Біздің мақсатымыз екі университеттің зерттеушілері мен инженерлерінің әлеуетін біріктіріп, жаңа технологияларды дамыту. Қазақстан мен Малайзияның бұл саладағы тәсілдері әртүрлі, сондықтан тәжірибе алмасып, бір-бірімізден үйрену арқылы үлкен нәтижеге қол жеткізе аламыз деп ойлаймын.