ЖИ жасаған жалған жұлдыздар

Жасанды интеллект Марк Цукербергті Астанаға әкеледі, Киану Ривзді қостанайлық зейнеткерге ғашық қылады.

Керек десеңіз, Бред Пит сізге сезімін білдіруі мүмкін. Алаяқтар нейрожелі арқылы танымал жұлдыздардың болмысы мен бейнесін айнытпай салып, азаматтарды алдап жүр. Бірі сол арқылы млндаған қаралым жинаса, енді бірі қалтаңызға қол сұғып, қаржыңызды жымқыруды көздейді.

Жақында Тредс желісінде Марк Цукербергтің мынадай суреті жарияланды. Бұны көрген қазақтілді оқырмандар америкалық медиамагнат Астанаға келіп, Бәйтеректің жанында суретке түсіпті деп сүйіншіледі. Постты 3 млнға жуық адам көріп, 100 мыңнан аса лайк басқан. Мыңдаған адам пікір жазып, бөлісіп жатыр. Ал шын мәнінде бұл жасанды интеллектінің жалғаны еді. Автор нейрожелі екенін көрсетпеген, тиісінше қалың қараша сенді. Демек технологияны игерсең, жұртты қапыда қалдыру қиын емес. Абырой болғанда, біздің «Цуккерберг» әлдебіреуге жазып, ақшасын жымқырмады. Бірақ нейрожелі келгелі қарыз сұрайтын жалған жұлдыздар көбейді. Мысалы, 62 жастағы қостанайлық зейнеткер жарты жылдан астам уақыт голливуд актері Киану Ривзбен сөйлескен. Анығы, жұлдыздың өзімен сөйлестім деп ойлап, алаяқпен хат алмасты.

Қылмыскер сезімін білдіріп, жүректі жаулайтын жазбалар жіберген. Кейін қиындыққа тап болғанын айтып, ақша сұрапты. Зейнеткер сол сәтте 400 доллар аударуға дайын болды. Бірақ егде тартқан әйел ақшаны шотқа қалай аудару керектігін білмегендіктен, банкке барады. Сол кезде қызметкерлер күдікті жағдайды байқап, дереу полицияға хабарлады. Нәтижесінде бұл алаяқтың айласы екені анықталды.

POLISIA.KZ:

- Бейтаныс адамдарға сенбеңіз. Атақты тұлға, досыңыз немесе туысыңыз сізге хат жазса да, әрқашан қырағы болыңыз. Алаяқтар сіздің сеніміңізді арттыру үшін танымал адамдардың фотосуреттері мен аттарын пайдалана алады. Бейтаныс адамдарға ақша жібермеңіз. Қаражатты алушға сенімді болмасаңыз, ешқашан шоттарға ақша аудармаңыз. Ақпаратты тексеріңіз. Егер біреу сізге әлеуметтік желілер немесе мессенджерлер арқылы хабарлама жіберсе, жауап беруге асықпаңыз.

Қазақстандық зейнеткер Киану Ривзбен хат алмасып жүргенде, француздық 56 жастағы Энн есімді әйел Бреда Питке 800 мың еуродан аса қаржы аударып жатқан еді. Әрине, актердің өзіне емес, алаяққа. Қылмыскер ЖИ арқылы әйгілі актердің сурет, видеоларын жасап, Эннге ғашық екенін айтады. Қымбат сыйлықтар беремін деп алдайды. Алайда оны алу үшін кедендік төлем ретінде 9 мың еуро төлеуге көндіреді. Нейрожеліге есі кеткені соншалық Энн күейімен ажырасуға дейін барады. Ал алаяққа бақуатты жұбайының жарты дәулетін иеленетінін жеткізеді. Сол сәттен бастап қылмыскер нейрожелі арқылы ауыр ауруға шалдықтым деген жаңа ертегісін бастайды. Тіпті Анджелина Джолимен соттасып жатқандықтан емделуге ақшам жоқ деп күйінеді. Соған сенген Энн алаяққа 830 000 еуро салып жібереді. Бұл − 500 млрд теңгеге сай қаржы.

POLISIA.KZ:

- «Шұғыл» ұсыныстардан сақ болыңыз. Көбінесе алаяқтар сізге дереу көмектесу керек деп шұғыл тактиканы қолданады. Олар қиындыққа тап болдым немесе емделуге ақша керек деп айтуы мүмкін. Мұндай өтініштерге жауап беруге асықпаңыз. Күдікті сілтемелер мен қосымшаларға абай болыңыз. Сілтемелерді ашпаңыз немесе олар ресми болып көрінсе де қолданбаларды бейтаныс көздерден жүктеп алмаңыз.

Әлеуметтік желіде бақылап жүрген сүйікті блогеріңіз де нейрожелі болуы мүмкін. Қазір ЖИ мамандары сұлу қыздың сұлбасын жасап, сонымен блог жүргізуді бастады. Мұны ашық істеп жүргендер де бар, бірақ жасырын ЖИ блогерлер де кездеседі. Оған қоса нейрожелі саяси һәм экономикалық астармен де пайдаланылып жүр. Бұл - жасанды интеллектіні жүгенсіз жіберудің зардабы ауыр болатынын көрсетеді.

Авторы: Бекзат Аманов