Жол саласы болашақтың мамандығы: неге жастар бұл маңызды салаға назар аударуы керек

Қазан айының соңғы жексенбісінде еліміз автожол саласы қызметкерлерінің күні атап өтеді. Бұл – ел дамуы мен қозғалысына үлес қосып жүрген адамдардың мерекесі. Инженерлер, жобалаушылар, зертхана мамандары мен механиктер күн сайын мыңдаған шақырымдық жолдың үздіксіз жұмысын қамтамасыз етеді.

Қазан айының соңғы жексенбісінде еліміз автожол саласы қызметкерлерінің күні атап өтеді. Бұл – ел дамуы мен қозғалысына үлес қосып жүрген адамдардың мерекесі. Инженерлер, жобалаушылар, зертхана мамандары мен механиктер күн сайын мыңдаған шақырымдық жолдың үздіксіз жұмысын қамтамасыз етеді.

"ҚазжолҒЗИ" АҚ дерегінше, 2024 жылы жол саласында 1,5 мыңнан астам маман жетіспейтіні анықталған. Инженерлер мен техниктер ғана емес, арнайы техника жүргізушілері, операторлар, зертхана мамандары сияқты кадрлар да тапшы.

Жас мамандарды даярлауда "Жол активтері сапасының ұлттық орталығы" РМК рөлі ерекше. Орталық мектеп оқушылары мен студенттер арасында кәсіптік бағдар беру жұмысын белсенді жүргізіп келеді. Соңғы жылдары елдің түкпір-түкпірінде 8 мыңнан астам кездесу өткен.

2024-2025 оқу жылында орталық мамандары 650-ге жуық іс-шара ұйымдастырды. Оның ішінде зертханалардағы ашық есік күндері, мектептер мен колледждерде өткен дәрістер мен шеберлік сабақтары бар. Студенттерге айсайын шамамен 85 мың теңге төленетін тәжірибеден өту мүмкіндігі қарастырылған. Бүгінде 200-ден астам студент осындай тәжірибеден өтіп, олардың 21-і кейін тұрақты жұмысқа қабылданған.

Саладағы тағы бір маңызды қадам – "Көлік құрылысы" және "Көлік нысандары" атты жаңа білім беру бағдарламаларының енгізілуі. Бұл бағдарламалар автомобиль және теміржол құрылысы, көпірлер мен тоннельдер, әуежай және аэродром инфрақұрылымын қамтиды.

Мемлекет жол саласына кадр даярлауға ерекше көңіл бөліп, бакалавриаттан бастап докторантураға дейінгі деңгейлерде білім гранттарын бөледі. Талап етілетін шектік балл – 50, сондықтан бұл мамандық көп түлектер үшін қолжетімді.

Бүгінгі жолшы – заманауи технологияны еркін меңгерген, талдау мен есепке жүйрік инженер. "Жол активтері сапасының ұлттық орталығы" РМК зертханаларында жасанды интеллект элементтері бар 217 түрлі сынақ түрі қолданылады. Мұндай технологиялар жол материалдарының сапасын әлдеқайда дәл бағалауға мүмкіндік береді.

Мамандық таңдау – өмірдегі ең маңызды шешім. Ол нарықтағы шын сұранысқа сай болуы тиіс. Ал қазіргі таңда Қазақстанның жол саласы жастарға тұрақтылық, жақсы еңбек жағдайы және өсуге жол ашатын мүмкіндік ұсынып отыр.

"Жол активтері сапасының ұлттық орталығы" РМК ұсынған материал