Жыл басынан бері СҚО ға көші қон бағдарламасы бойынша 400 отбасы барды

АСТАНА, 11 мамыр-Sputnik. Жыл басынан бері Солтүстік Қазақстан облысына көші-қон бағдарламасы бойынша 400 отбасы көшіп барды, деп хабарлайды 24.kz.
Оларға мемлекет тарапынан көтермеақы төленіп, баспана алуға "Экономикалық ұтқырлық сертификаты" беріледі. Қаржы көлемі биыл 7 млн теңгеге дейін ұлғайтылды.

Павел Корнилов былтыр жанұясымен Талдықорғаннан Петропавлға көшіп келді. Көші–қон бағдарламасы бойынша әр адамға төленетін субсидиядан бөлек, баспанаға 7 млн теңге алған.

"Көшіп келген кезде пәтер жалдап тұрдық. Оның төлемі мемлекет есебінен жасалды. Содан кейін "Экономикалық ұтқырлық сертификатын" алдық. Оның үстіне жинаған қаражатымызды қосып, ипотекаға 3 бөлмелі пәтер сатып алдық", - дейді ол.

Өңірге көшіп келген әр адамға 300 мың теңге бір реттік төлемақы беріледі. Сонымен қатар биыл тұрғын үй сатып алуға берілетін қаржы да ұлғайды.

"Былтырғы жылы сертификат құны 4 млн 500 мың болатын. Сонымен қатар ол 4,5 млн теңгені әр көшіп келген адам өз қалтасынан шығару керек еді. Сонда жалпы саны 9 млн. теңгеге үй алуға болатын еді. Биылғы жылдың ерекшелігі 7 млн теңге үкіметтен төленеді. Егер үйдің құнына жетіп тұрса, көшіп келген адам өз қалтасынан төлемесе болады", - дейді СҚО бойынша еңбек мобильділігі орталығының директоры Нұрлан Биболаев.

Биыл Солтүстік Қазақстан облысына 3020 қоныс аударушы мен қандас көшіп келеді деп жоспарланып отыр. Қазір жылдық жоспардың 60 пайызы орындалған.