1 қаңтардан бастап банктер қазақстандықтардың шоттары мен депозиттері туралы мәліметтерді бере бастайды

2027 жылғы 1 қаңтардан бастап екінші деңгейлі банктер отбасының материалдық жағдайын бағалау және кейіннен жәрдемақы тағайындау үшін қазақстандықтардың кірістері, шығыстары мен депозиттері туралы ақпаратты Еңбек және халықты әлеуметтік қорғау министрлігіне беретін болады. Бұл туралы Құрылтай отырысында министр Асқарбек Ертаев мәлімдеді, деп хабарлайды Tengrinews.kz тілшісі.

Ақпарат қалай беріледі?

Банктер қазақстандықтардың шоттары мен депозиттері туралы мәліметтерді жәрдемақы алушының және оның отбасы мүшелерінің келісімімен береді. Бұл мәліметтер отбасының материалдық жағдайын бағалау үшін пайдаланылады, деп түсіндірді Ертаев.

Мәселе мынада, мемлекет көмекті мұқтаждық деңгейін ескере отырып тағайындауды жоспарлап отыр. Бұл ретте тек жалақы немесе мүліктің болуы ғана емес, сонымен қатар отбасының жалпы қаржылық жағдайы да бағаланады.

"Отбасының цифрлық картасы мемлекеттік деректер базасынан мәліметтер жинайды. Ол үй шаруашылығын 8 негізгі бағыт бойынша бағалайды. Онда 50-ден астам белгі бар. Оған жұмыспен қамту, табыс, жылжымалы және жылжымайтын мүлік, несие жүктемесі, білім деңгейі және тағы басқалар кіреді. Осы материалдық және әлеуметтік жағдайдың жалпы көрінісі негізінде жүйе тиісті санатты анықтайды", – деді министр.

Оның айтуынша, жүйе күн сайын жаңартылып тұратын 30 деректер базасымен интеграцияланған, ал әл-ауқатты бағалау ай сайын жүргізіледі.

Егер отбасының материалдық жағдайы нашарлап, ол мұқтаждар санатына өтсе, мемлекеттік қолдау шаралары кезекті өтінішті күтпестен, проактивті түрде тағайындалады.

Келісім болмаса – жәрдемақы да жоқ па?

Tengrinews.kz редакциясының иелігінде Еңбек және халықты әлеуметтік қорғау министрлігінің арнаулы мемлекеттік жәрдемақыларды тағайындауға қатысты бұйрық жобаларының бірі бар. Құжатқа сәйкес, банктік деректерді жинауға және тексеруге келісім беруден бас тарту әлеуметтік төлемдерді тоқтата тұруға негіз болуы мүмкін.

Аталған ережелерде мұндай келісімнің болмауы жәрдемақы төлеуді тоқтата тұру негіздерінің қатарында да көрсетілген.

"Тұлғаның (отбасының), отбасы мүшелерінің, үй шаруашылығының келісім бермеуі арнаулы мемлекеттік жәрдемақы төлеуді тоқтата тұруға негіз болады", – делінген құжатта.

Толығырақ сілтеме бойынша оқыңыз.

Реформаның мәні неде?

2027 жылғы 1 қаңтардан бастап Қазақстанда 10 мемлекеттік жәрдемақыны тағайындау қағидалары өзгереді.

Жәрдемақы тағайындау кезінде адамның немесе отбасының материалдық жағдайы ескеріледі. Ол үшін әл-ауқаттың бес санаты енгізіледі:

А – жоғары деңгей. Табысы жоғары, жылжымайтын мүлкі және басқа да активтері бар отбасылар. B – ауқатты деңгей. Тұрақты табысы, баспанасы және орнықты қаржылық жағдайы бар отбасылар. C – қанағаттанарлық деңгей. Табысы аз, несиелері бар және қаржылық мүмкіндіктері шектеулі отбасылар. D – экономикалық тұрғыдан осал деңгей. Табысы төмен, қарыздары бар немесе жұмысқа орналасуда қиындықтары бар отбасылар. E – экономикалық және әлеуметтік тұрғыдан осал деңгей. Ауыр өмірлік жағдайға тап болған отбасылар.

Жаңа ережелерге сәйкес, А және В санаттарына жатқызылған отбасылар бекітілген тізбедегі жәрдемақыларды ала алмайды.

Егер адам төлемді алып жүрсе, бірақ бағалау кезінде оның отбасы А немесе В санатына жатқызылса, жәрдемақы төлеу тоқтатылуы мүмкін. Егер материалдық жағдайы нашарлап, келесі ай сайынғы бағалау кезінде отбасы C, D немесе E санатына түссе, төлем қайта басталуы мүмкін.

Өзгерістер, атап айтқанда, бала туғанда берілетін біржолғы жәрдемақыға және бала бір жарым жасқа толғанға дейінгі күтім бойынша ай сайынғы төлемге қатысты болады. 2027 жылғы 1 қаңтардан бастап бұл жәрдемақыларды тағайындау кезінде де отбасының материалдық жағдайы ескерілетін болады.

Тағы оқыңыз: "Байлар көмек алмауы керек": Бектенов әлеуметтік төлемдер туралы пікір білдірді

Бізді Google-дың негізгі дереккөздер тізіміне қосыңыз

Қосу