128 адам қаза тапты: Гонконгтегі тұрғын үй кешеніндегі өрт сөндірілді

Гонконгтегі тұрғын үй кешеніндегі жойқын өрт толық сөндірілді. Жергілікті билік жалпы 128 адамның қаза тапқанын растады. Олардың ішінде бір өрт сөндіруші бар, деп хабарлайды Egemen.kz.

Фото: Ашық дереккөз

Қауіпсіздік қызметінің басшысы Крис Танның айтуынша, іздеу жұмыстары толық аяқталған. Жедел штабтың мәліметіне сәйкес, шамамен 200 адам із-түссіз жоғалып кеткен, кем дегенде 79 адам түрлі жарақат алған.

«Қазір біздің негізгі міндетіміз – ғимарат ішіндегі температураны төмендету. Мамандар нысанның қауіпсіз екенін растағаннан кейін полиция дәлелдер жинауға және тергеуге кіріседі», деді Крис Тан.

Reuters мәліметінше, брифинг кезінде билік өкілдері өрт шыққан ғимаратағы дабыл жүйелері дұрыс жұмыс істемегенін мәлімдеді. Сондай-ақ, қайтыс болғандардың бір бөлігінің жеке басы әлі анықталмағаны айтылды. Құтқару жұмыстарына шамамен 1 мың полицей жұмылдырылған. Нысандардан 108 адамның мәйіті табылып, тағы төртеуі ауруханада алған жарақаттарынан көз жұмған.

Ресми ақпаратқа сүйенсек, өртті сөндіру барысында 12 өрт сөндіруші жарақат алған, олардың бірі ауыр хәлде жатыр.

Бұған дейін қала билігі өртке байланысты абайсызда кісі өлтіру күдігімен үш адамды ұстағанын хабарлағанын жазған едік. Тексеру барысында ғимараттың сыртқы қабатында отқа төзімсіз материалдар қолданылғаны анықталды.