15 мың адамды заңсыз тіркеп, 79 млн теңге жымқырған:Астанада жеке клиника басшысы сотталды

АСТАНА, 14 шілде – Sputnik. Астанадағы жеке клиникада медициналық қызметтер үшін жалған есептеулер анықталды, деп хабарлайды қаржылыл мониторинг агенттігі.

Жеке клиника басшысы МӘМС-тен қаржы алу мақсатында емханаға тіркелген азаматтар санын жасанды түрде көбейткен.
Бұл схеманы жүзеге асыру үшін ол "Денсаулық сақтауды дамытудың ұлттық ғылыми орталығы" қызметкерін тартқан.

"Ол қызметтік қолжетімділігін пайдаланып, жалған өтінімдерді заңсыз мақұлдап отырған. Нәтижесінде қолданыстағы ережелер бойынша мұндай тәсіл тек жекелеген санаттағы азаматтарға ғана қолданылатынына қарамастан, 15 мыңнан астам адам жазбаша өтініштер негізінде емханаға тіркелген", - делінген мәлімдемеде.

Тексеру барысында басқа өңірлердің тұрғындарын, заңды өкілдерінің құжаттарынсыз кәмелетке толмағандарды, сондай-ақ елден тыс жерге кеткен азаматтарды тіркеу фактілері анықталды.

Сондай-ақ клиника басшысы "Damu Med"-тегі медицина қызметкерлерінің есептік жазбасын бақылауға алған. Осылайша азаматтарға медициналық қызмет көрсетілгені туралы жалған мәлімет енгізіп, Қордан қаржы алған.
Сот үкімімен клиника басшысы 5 жылға, ал орталық қызметкері 3 жылға сотталды.