17 жастағы қыз өзінің жігітін 14 мың долларға құлдыққа сатып жіберген (ВИДЕО)

19 жастағы жігіт Қытайдағы бильярд клубында жас қызбен танысқан. Қыз өзін бай әулеттің мұрагері ретінде таныстырып, жігітті "беделді жұмыс пен пайдалы таныстықтар бар" деп сендіріп, Мьянмаға бірге баруға көндірген. Алайда шекараға жеткен сәтте екеуін қылмыстық топ ұстап алып, сол жерде қыз із-түссіз жоғалып кеткен, деп хабарлайды Arasha.kz.

Жігіт төрт ай бойы тұтқында болып, ауыр жағдайға тап болған. Оны тәулігіне 20 сағат бойы компьютер алдында отырғызып, киберқылмыс жасауға мәжбүрлеген, ұрып-соғып, азаптаған. Сол уақыт ішінде ол шамамен 10 келі салмақ тастап, құлағының бір бөлігі есту қабілетінен айырылған.

Қылмыскерлер жігіттің отбасынан 48 мың доллар көлемінде өтемақы талап еткен. Алайда туыстары бұл соманы бірден жинай алмағандықтан, жігіт біраз уақыттан кейін ғана бостандыққа шыққан.

Ал әлгі қыз осы аралықта Тайландқа барып, демалып, түскен қаржының бір бөлігін жұмсап үлгерген. Кейін Қытайға оралған кезде ол полиция тарапынан ұсталған.