​2026 жылға доллар бағасының болжамы өзгерді

Қазақстан Ұлттық Банкі сарапшылар қауымдастығы арасында жүргізілген кезекті макроэкономикалық сауалнаманың нәтижесін жариялады.

Жаңартылған мәліметтерге сәйкес, 2026 жылға доллардың теңгеге шаққандағы болжамды бағамы 537-ден 535 теңгеге дейін төмендетілді. 2027 жылға болжам 559,5-тен 555,1 теңгеге, ал 2028 жылға 580-нен 578 теңгеге түзетілді.

Б9л ретте мұнай бағасына қатысты сценарий шарттары барлық болжамды кезеңде сәл төмендеді. 2026 жылы Brent маркалы мұнайдың бағасы 1 баррель үшін орта есеппен 62 АҚШ доллары деңгейінде, 2027 және 2028 жылдары тиісінше 63,7 және 65,3 АҚШ доллары деңгейінде болады деп күтіледі.

Дегенмен, Қазақстан экономикасының өсіміне қатысты болжамдар жақсарды. ЖІӨ өсуіне қатысты болжам 2026 жылға – 4,8%-дан 5%-ға, 2027 жылға – 4,4%-дан 4,5%-ға, 2028 жылға – 4,2%-дан 4,3%ға дейін өсті.

Респонденттер 2026 жылы инфляция деңгейі біршама төмен болады деп болжайды – бұл ретте болжам медианасы 10,8%-дан 10%-ға дейін төмендеді. Сарапшылар 2027-2028 жылдары инфляция төмендейді деп күтеді – тиісінше 2027 жылы – 8% және 2028 жылы – 7%.  

Сарапшылардың базалық мөлшерлеме бойынша осы жылға күтулері аса өзгерген жоқ – 15,9% (алдыңғы болжам – 16%). 2027 жылдың соңына күтулер медианасы 12,5%-дан 12%-ға дейін төмендеді, ал 2028 жылға – 10%-дан 11%-ға дейін өсті.

Сыртқы сауда бойынша болжамдар аса сақтықпен жасалды. 2026 жылы экспорт көлемі 83,7 млрд доллар (бұрын 88 млрд болған), импорт 73,1 млрд доллар (бұрын 77 млрд) деңгейінде болады деп күтілуде.

Жалпы сауалнамаға қатысушылар мұнай табыстары мен сыртқы саудадан түсетін қаражат бойынша орташа болжам жасап, орта мерзімді перспективада теңгенің тұрақты бағамын сақтап қалуға тырысады.

Бүгін, 15:45