2029 жылы инженерлік инфрақұрылымның жай күйі нормативтік жұмыс деңгейіне жеткізіледі

— Коммуналдық қызметтер саласындағы тарифтік саясат мәселелері теңдестірілген және жүйелі тәсілді талап етеді. Шешімдер қабылдау кезінде реттеуші тұтынушылар мен табиғи монополиялар субъектілері мүдделерінің теңгерімін сақтайды. Аталған мәселелерді талқылау ашықтық, негізділік және пәндік талдау негізінде жүзеге асырылады. Ең алдымен, елдің коммуналдық инфрақұрылымы көптеген жыл бойы жоғары тозу жағдайында болғанын айту керек. Жүйелі инвестициясыз бұл сөзсіз апаттың өсуіне, қызмет сапасының нашарлауына, жылу, су және электр қуатының үзілуіне әкеледі, — деді ол тұрғын үй-коммуналдық шаруашылығы саласында тариф қалыптастыру мәселесіне арналған дөңгелек үстел барысында.

Оның мәліметінше, 2023 жылдан бастап тұрғын үй-коммуналдық шаруашылығы инженерлік инфрақұрылымын жаңғырту бойынша ауқымды жұмыс басталды. Осы уақыт ішінде 19 мың шақырымнан астам инженерлік желілер жөнделді, яғни жұмыс көлемі 2022 жылмен салыстырғанда екі есеге өсті.

— Бұл жыл сайын тозудың орта есеппен 3 пайызға төмендеуін қамтамасыз етуге мүмкіндік берді. Табиғи монополия субъектілері қызметкерлерінің жалақысы 50-100 пайызға өсті. 2029 жылға қарай инженерлік инфрақұрылымның жай-күйін нормативтік жұмыс деңгейіне дейін жеткізу жоспарланып отыр, — деді Тимур Қосымбаев.

Табиғи монополияларды реттеу комитетінің баспасөз қызметінің ақпаратына сәйкес, қазір реттелетін коммуналдық қызметтерге тарифтерді көтеруге мораторий қолданылады. Бұл ретте реттелетін коммуналдық қызметтерге мыналар жатады: электрмен жабдықтау, жылумен жабдықтау, сумен жабдықтау және су бұру.