30 млн күдікті қоңырау бұғатталды

Соңғы үш жылда елдегі телекоммуникация саласына 1 трлн теңгеден аса инвестиция тартылды. Бүгінде 20 миллионнан астам мобильді абонент және ресми тіркелген 3,7 миллион пайдаланушы байланыс қызметтерін қолданып жүр. Бүгін Үкімет отырысында ақпараттық және телекоммуникалық инфрақұрылымды дамыту мәселесі талқыланды. Сол жерде болған әріптесім тақырыпты жалғастырады.

Альмира Оразбай, тілші:

- Телекоммуникацияның дамуы арқылы еліміздің цифрлық трансформациясы алға жылжып жатыр. Премьер-министрдің орынбасары әрі Жасанды интеллект және цифрлық даму министрінің сөзіне сүйенсек, Бүгінде Интернеттің орташа жылдамдығы секундына 94 мегабитке жеткен. Сондай-ақ тиісті трафикті тұтыну көлемі де айтарлықтай артқан. Бірақ тоқмейілсуге жол жоқ. Қазір саланы ілгерілету мақсатында “Қолжетімді интернет” ұлттық жобасы іске асып жатыр. Ол халықты, әсіресе ауыл тұрғындарының сапалы байланысқа қол жеткізуіне мүмкіндік береді. 

Жаслан Мәдиев, ҚР Премьер-Министрінің орынбасары, Жасанды интеллект және цифрлық даму министрі:

- Саланы дамыту 2024–2027 жылдарға арналған «Қолжетімді интернет» ұлттық жобасы аясында іске асырылуда. 2027 жылдың соңына дейін халықтың 100%-ы интернетпен қамтылады. Интернет жылдамдығы 100 Мбит/с-тан асып, оптикалық байланыс желілері ауылдық елді мекендердің 90%-ына дейін тартылады. 2027 жылдың соңына қарай еліміздегі 4786 ауылда оптикалық желі тікелей үйлерге дейін жеткізіледі. Осылайша ауылдардың 90%-дан астамы сымды технологиялар арқылы жоғары жылдамдықты интернетке қосылады.

Министрлік алаяқтыққа қарсы күресті күшейту үшін байланыс операторларына жаңа талаптар енгізді. Оның нәтижесі де жоқ емес. Мәселен, бір абоненттің атына тіркелген телефон номерлерінің саны шектелді. Сонымен қатар 30 миллионнан астам күдікті қоңырау бұғатталды.

Жаслан Мәдиев, ҚР Премьер-Министрінің орынбасары, Жасанды интеллект және цифрлық даму министрі:

- Байланыс операторларының және Ұлттық банктің антифрод жүйелері арасындағы өзара әрекет ету тәртібі бекітілді. GSM-шлюздерді яғни симбокстарды елге әкелу және тіркеу ережелері қабылданды. Бір абоненттің атына тіркелетін телефон нөмірлерінің саны шектелді. Қабылданған шаралардың нәтижесінде 2024 жылдың басынан бастап 30 миллионнан астам күдікті қоңыраулар бұғатталды. Осылайша Қазақстан телекоммуникация саласында өңірлік көшбасшы позициясын нығайтуда.

Айтқандай, еліміз Еуропа мен Азия арасындағы интернет-трафик транзитінде стратегиялық рөл атқарады. Әзірге бұл процесстегі біздің үлесіміз 1,5 пайыз. Алайда алдағы уақытта көрсеткішті бес пайызға дейін арттыру көзделіп отыр. Ал жалпы саланы дамыту бағытында қабылданған барлық шара цифрлық экономиканың тұрақты дамуына жол салуға тиіс. 

Авторлары: Альмира Оразбай Марат Диханбаев