32 су шаруашылығы нысанында шағын ГЭС салу жоспарланып отыр

Қазақстанда су шаруашылығы нысандарының энергетикалық әлеуетін тиімді пайдалану мақсатында 32 нысанда шағын гидроэлектр станциясын (ГЭС) салу жоспарланып отыр.

Бұл жұмыстар «Қазсушар» республикалық мемлекеттік кәсіпорнының су шаруашылығы нысандарында шағын гидроэнергетиканы дамыту жөніндегі Жол картасы аясында жүзеге асырылуда.

Кәсіпорын мамандары жүргізген талдау нәтижесінде шағын ГЭС салуға қолайлы 32 нысан іріктелген. Қазіргі уақытта Қарағанды облысындағы Самарқанд су қоймасында, Ақтөбе облысындағы Қарғалы су қоймасында және Абай облысындағы Қаракөл су қоймасында құрылысқа қажетті жобалау-сметалық құжаттама әзірленіп жатыр.

Сонымен қатар тағы 23 жоба бойынша техникалық және экономикалық есептеулер жүргізілуде. Бұл жұмыстар болашақта нысандардың энергетикалық тиімділігін бағалауға және инвестициялық мүмкіндіктерін айқындауға бағытталған.

Жол картасы шеңберінде басым жобалар да анықталған. Олардың қатарында Қостанай облысындағы Қаратомар және Жоғарғы Тобыл су қоймалары, Жетісу облысындағы «Аяқ-Құншан» магистральдық каналы мен Түркістан облысындағы Үлкен Келес магистральдық каналы бар.

Сондай-ақ Алматы облысының Еңбекшіқазақ ауданындағы Үлкен Алматы каналының транзиттік учаскелеріне шағын ГЭС орнату мақсатында «Қазсушар» РМК жеке инвестормен ынтымақтастық туралы меморандумға қол қойған.

Су ресурстары және ирригация министрі Нұржан Нұржігітов жобалар толық жүзеге асырылған жағдайда айтарлықтай нәтиже күтілетінін атап өтті.

«Барлық жоба толық іске асырылған жағдайда "Қазсушар" РМК нысандарында өндірілетін электр энергиясының жалпы қуаты 30 мегаватқа жетеді», – деді министр.

Қазіргі уақытта кәсіпорынның балансында үш шағын гидроэлектр станциясы жұмыс істейді. Олар Солтүстік Қазақстан облысындағы Сергеев гидроторабында, Қарағанды облысындағы Ынтымақ су қоймасында және Қорғас өзеніндегі «Достық» гидроторабында орналасқан.

Мамандардың пікірінше, шағын ГЭС жобалары жаңартылатын энергия көздерін дамытуға, су шаруашылығы нысандарының тиімділігін арттыруға және өңірлердің энергиямен қамтылуын жақсартуға мүмкіндік береді. Сонымен қатар бұл жобалар көміртегі шығарындыларын азайтуға және елдің «жасыл экономикаға» көшу стратегиясын қолдауға ықпал етеді.