36 жастағы ауыл әкімі өз ауылына 345 млн теңге инвестиция тартқан

Президент Қасым-Жомарт Тоқаев 2020 жылы халыққа Жолдауында ауыл әкімдерін тікелей сайлау бастамасын көтерген еді. Сол уақыттан бері еліміз бойынша 2 334 ауыл әкімі сайланған. Бүкіл билік жүйесінің тірегі саналатын ауыл әкімдерінің ішінде нақты нәтиже көрсетіп жатқандары жеткілікті. Солардың бірі – Ақтөбе облысы, Мәртөк ауданы Тәңірберген ауылдық округінің әкімі Медет Бекжанов, деп жазады Egemen.kz.

Фото: amanatpartiasy.kz

36 жастағы Медет Бекжанов Тәңірберген ауылына «Дипломмен – ауылға» бағдарламасы бойынша барған. Аталған ауылда еңбек жолын музыка пәнінің мұғалімі болып бастаған Медет Бекжанов қоғамдық істерде белсене көзге түсіп, 2022 жылы ауыл әкімі болып сайланған. Тәңірберген ауылының әкімі «Qazaqstan» ұлттық арнасының «Ашық алаң» бағдарламасында қызмет жолы туралы қызықты мәліметтермен бөлісті.

«Ауылға барып, баспаналы болуды көздедім. Арманым орындалып,  отбасын да құрдым. Сондағы балабақшада музыкадан білім бере жүріп, ауданның мәдени іс-шараларына белсене араластым. Сондай-ақ өзім қызмет еткен балабақшада меңгеруші болдым. 2022 жылы ауыл әкімдерін сайлау реформасына сай мен де бәсекеге түстім. Қарсыласым ауылдың байырғы тұрғыны болды. Сайлау науқанында арнайы бағдарламамды жарияладым, тіпті халыққа бейнеүндеу түсірдім. Нәтижесінде мен жеңіске жеттім», деді Медет Бекжанов.

Ауыл әкімінің айтуынша, нағыз жұмыс сайлаудан кейін басталған. Ол бүгінде  халыққа берген уәделерін кезең-кезеңімен орындап келеді. Іскер әкім бүгінге дейін Тәңірберген ауылына миллиондаған сомаға инвестиция тартқан.

«Ауылымыз Саржансай, Кеңсахара елді мекендерінен тұрады. Сайлау барысында Кеңсахара ауылына ұялы байланыс жүйесін орнатуға уәде берген едім. Сол уәдемде тұрып, жергілікті кәсіп иелерін тарта отырып, халық сұранысын орындадық. Сонымен бірге, ауылға кәсіпкерлерді жұмылдырып, қосымша балабақша салдық. «Ауыл аманаты» бағдарламасы аясында 345 млн теңге инвестиция тартып, 50-ден астам жаңа жұмыс орнын аштық. Дәстүрлі мал шаруашылығынан бөлек саяжай ашып, жылыжай ісін жолға қойдық. Ауыл өнімдері ауданда да сатылып жатыр. Жергілікті халық 20-дан астам өнімді ауылда өндіріп, өзін-өзі қажетті азық-түлікпен қамтып отыр», деді ауыл әкімі.

Медет Бекжанов өз сөзінде ауыл әкімдерінің құзыретін нақтылау бастамасын да көтерді. 

Айта кетейік, 28 қараша күні Астанада Мемлекет басшысының қатысуымен ауыл әкімдерінің диалог-платформасы өтті. 

Жиында Президент ауыл әкімдерінің өкілеттіктерін нақтылау жөнінде тапсырма берді.