40 жастағы Екібастұз тұрғыны аяғына салған екпеден кейін қайтыс болды

Екібастұз тұрғыны Жеңіс Бекжігітов жеке клиникаға жүгінгеннен кейін қайтыс болды, – деп хабарлайды Aikyn.kz сайты irbistv.kz сайтына сілтеме жасап.

Туыстарының айтуынша, оған бір ғана екпе салынған, содан кейін оның жағдайы күрт нашарлаған.

Марқұмның туыстары бұл жағдайды әлеуметтік желі арқылы баяндады. Олардың айтуынша, Жеңіс 8 қыркүйекте тізе буынының ауырсынуына байланысты жеке клиника дәрігерлеріне жүгінген. УДЗ жасалып, оған "оң жақ тізе буынының остеоартриті" диагнозы қойылған.

– 10 қыркүйекте сағат 15:50-де дәрігер екпе салды. 11 қыркүйек күні таңертең қатты ауырсыну мен ісік пайда болды. Жедел жәрдем тек 40-50 минуттан кейін келді. Дәрігер телефон арқылы аспирин мен диклофенак ішуге кеңес беріп, кейін қабылдауға келуді ұсынды. 12 қыркүйекте жағдайы күрт нашарлап кетті: дене қызуы көтеріліп, әлсіздік, есінен тану, қан қысымы 90/60 болды, – деп жазады Жеңістің туыстары.

Туыстары оны өздері Екібастұз ауруханасына жеткізген. Ол жерде шұғыл операция жасалған. Келесі күні Жеңіс жансақтау бөліміне түсті. Дәрігерлер мұны ауруханада жасанды тыныс алу аппаратының болмауымен түсіндірген. Ал 14 қыркүйек күні таңертең оның қайтыс болғаны хабарланды.

– Біз, Жеңістің туыстары, медициналық көмектің тиісті деңгейде көрсетілмеуі әрі екпенің реакциясын бақылаусыз тағайындалуынан бастап, жедел жәрдемнің әрекетсіздігінің бәрі – оның өмірін жалмады деп есептейміз, – дейді марқұмның жақындары.

Олар ҚР Денсаулық сақтау министрлігі мен Бас прокуратураға жүгінген. Сонымен қатар, Павлодар облысының Полиция департаменті медициналық қызметкердің кәсіби міндетін тиісті деңгейде орындамауы фактісі бойынша қылмыстық іс қозғалғанын мәлімдеді.

– Оқиғаның мән-жайы мен себептері тергеу барысында анықталады. ҚР Денсаулық сақтау министрлігінің Медициналық және фармацевтикалық бақылау комитетінің Павлодар облысы бойынша департаменті медициналық қызметкерлерге қатысты жоспардан тыс тексеру жүргізіп жатыр, – деп хабарлады полиция департаменті.

Тексеру нәтижесі бойынша кешенді сот-медициналық сараптама тағайындалатыны атап өтілді.