48,45 млрд теңге: Kaisar Plaza мен элиталық пәтерлер аукционға шығарылды

Сатылымдағы ең қымбат нысан – ауданы шамамен 64 мың шаршы метр болатын Kaisar Plaza сауда-кеңсе орталығы. Оның бастапқы бағасы 47,3 млрд теңге деп белгіленген.

Сонымен қатар аукционға жалпы құны 517,8 млн теңгеден асатын зергерлік бұйымдар мен сағаттардан тұратын 36 лот қайта шығарылды. Бұдан бөлек, бірнеше элиталық пәтер де саудаға қойылған.

Олардың қатарында:

«Парижский квартал» тұрғын үй кешеніндегі пәтер – 95,9 млн теңге; осы кешендегі екі деңгейлі пәтер – 308,8 млн теңге; Green Village тұрғын үй кешеніндегі пәтер – 181,9 млн теңге.

Электронды сауда-саттық шілде айында мемлекеттік мүлік порталында өтеді.

Еске салсақ, 2025 жылдың соңында Алматыдағы «Байсат» базары да бірнеше рет аукционға шығарылғанымен, сатып алушы табылмаған. Бұрын бұл нысан экс-президент Нұрсұлтан Назарбаевтың жиені Қайрат Сатыбалдыға тиесілі болған. Желтоқсанда базардың бағасы 26,7 млрд теңгеге дейін төмендетілгенімен, оған қызығушылық танытқан сатып алушылар болмады. Ал қараша айында оның бастапқы құны 28,6 млрд теңге болған еді. Мемлекетке қайтарылған актив 2024 жылдан бері әлі сатылған жоқ.