8 жастағы астаналық оқушы шахматтан әлем рекордын жаңартты

Мұндай жетістік аталған әуесқой спорт тарихында алғаш рет тіркеліп отыр. Алиша тіпті бірнеше мәрте әлем чемпионы атанған  Хоу Ифань мен Юдит Полгарды ұтып, жаһанды мойындатты. 

8 жастағы Алиша Биссалиева ерекше дарынымен көпшіліктің ықыласына бөленді. Ол өзі қатысқан ірі турнирлердің барлығында жеңіске жеткен. Арманы асқақ бүлдіршіннің шахматты таңдауы кездейсоқтық емес. «Жасынан математикаға қызығып, осы спорт түріне дағдыландым», - дейді.

Алиша Бисалиева, шахматтан әлем чемпионы:

- Менің арманым әйелдер арасындағы шахматтан әлем чемпионы атанып, ең жоғары атақ- гроссмейстер болу. Маған ойынның классикалық түрі қатты ұнайды, себебі онда стратегиялық тұрғыда ойланасын және әр жүрісінде есеп бар.

Жастайынан жасындай жарқыраған жасөспірімнің дарынын жаттықтырушысы да бірден байқапты. Содан бері екінің бірінде кездесе бермейтін талантын одан әрі дамытуға тырысқан. Алишаның болашақты әлі талай белесті бағындыратынына сенімді. Қазір жаттықтырушысы екеуі 10 жастағы оқушылар арасындағы Қазақстан чемпионатына дайындалып жатыр.

Ержан Шакенов, жаттықтырушысы:

- Біздің мақсатымыз – Алишамен бірге тек әйелдер арасындағы әлемдік шахмат рекордын жаңарту ғана емес, сонымен қатар әйелдердің де лайықты түрде бәсекелесе алатынын бүкіл әлемге дәлелдеу.

Жас жеңімпаз небәрі бес жасында осы спорт түріне қызығып, жарты жылда жеңіс тұғырынан көріне бастаған. Әкесінің айтуынша, оған бұндай дарын отбасынан дарыған. Алишаның ағасы да топ жарып жүрген спортшы.

Жұмабек Бисалиев, Алишаның әкесі:

- Әр жарысқа мықты дайындық жасау керек, сол себептен енді бала болғансоң ойнағысы да келеді кейде бала ауырмайда тұрмайды. Енді бәрін өтіп шықтық бірақ енді өзі мына намыстанып дегендей Қазақ еліне жеңіс әкелемін деп өзі еңбектенгесін сол осындай жетістіктері бар.

Алиша осы уақытқа дейін 51 партия шахмат ойнап, соның 48 інде жеңіске жеткен. Қалған екі ойын тең аяқталса, бір рет жеңілген. Бибісара Асаубаеваға қарап бой түзейтін оқушы енді ересектер арасындағы шахматтан жеңімпаз болып, әлемдік үздік шахматшылар тізіміне енсем дейді Асылжан Құрманғали,

Авторы: Абдулхамит Булекбаев