Абу Дабиде қазақтың дәстүрлі тұрмыс салты таныстырылды

Кең туырлықты киіз үй мен атадан балаға мирас болған аңшылық үлгісі және ісмерлер қолынан шыққан бұйымдар көрсетілді. Ұлттық бітім-болмысымызды айшықтаған көрмеге елімізде шығатын брендтік өнімдер де қойылды. Бастамаға қазақ дипломатиялық миссиясы мен мәдениет орталығы ұйытқы болды.

Қазақстан секілді Араб әмірліктері де толеранттық ұғымына әу бастан берік. Қоғам көзқарасы ортақ құндылық пен біркелкі ұстанымға негізделген. Елде 200-ге тарта ұлт өкілінің тату-тәтті ғұмыр кешуі осы сөзімізге дәлел. Оның үстіне араб жұрты жыл сайын қарашада бірлік күнін атап өтеді. Биыл Абу Даби атаулы датада сан түрлі мәдениет өкілінің басын қосып, өзара достық фестивалін өткізді.

Мона Салах, БАӘ толеранттық министрлігінің маманы:

- Фестивальдің мақсаты – адамзаттық құндылықтарды ілгерілету, сан түрлі мәдениет пен өркениетті тоғыстыру. Бірлікте ғұмыр кешуге үндеу. Қазақстанның бұл іс-шараға қатысуы екі мемлекеттің ортақ құндылықтарды нығайтуға деген ұмтылысын білдіреді. Осы арқылы халықтар достығы насихатталып, арадағы сенімді диалог дамиды.

Бұл күндері әмірлік еліміздің Таяу Шығыс аймағындағы ірі экономикалық серіктесі. Арада ауқымды алыс-беріс бар. Бизнес байланыстар жыл сайын кеңейіп, бірлескен жобалар саны артып келеді. Осыны ескерген қазақстандық дипмиссия жетекшілері екі елдің ынтымағын арттыратын іс- шарадан қалыс қалмай, ұлттық болмысымызды айшықтады. Фестиваль алаңында көрме ұйымдастырылып, киіз үй тігілді. Қазақ жеріндегі аңшылық пен қолөнер жасау дәстүрі таныстырылды.

Дастан Есмұрат, Қазақстан елшілігінің үшінші хатшысы:

- Мұнда Қазақстан елшігінің ұлттық павильоны орнатылып, киіз үйі тігілген болатын. Мұнда дәріптеліп жатқан толеранттылық мағына, ой өте терең болып саналады. Осындай іс-шаралар Қазақстан мен БАӘ арасындағы мәдени дипломатияны дамытуға үлкен үлес қосып келеді.

Несри Әлибрахим, Абу Даби тұрғыны:

- Қазақстан жайлы көбірек біліп жатырмыз. Маған мына жерде қолөнер жабдықтары ұнады. Әсем безендірілген. Қазақтың жан дүниесіндегі сұлулықты білдіріп тұрғандай.

Жалпы қазақ пен арабтың дәстүрлі тұрмыс салты бір-біріне ұқсас. «Мәселен, саяшылықпен айналысып, сейіл құру қос халыққа да тән», - дейді келушілер. Мұндай ерекшелік елдер арасындағы байланысты ұдайы дамытып, келешегін кемелдендіруге сеп. Айта кетейік, елімізде өндірілетін сусындар мен тәттілер, сондай-ақ азық-түлік түрлері шығанақ нарығына шығып, танымал болып келеді. Ұйымдастырушылар осы жайтты ерекше атап өтіп, көпшілікке брендтік өнімдерден дәм татқызды. 

Авторы: Рауан Мыңбай