“Әдетте қоқысқа тасталады“ Стамбул қонақ үйінде ерекше мәзір таныстырылды

Barceló Istanbul қонақүйі экологиялық проблемалар мен жауапты тұтыну мәселелеріне арналған алты кезеңнен тұратын гастрономиялық акция өткізді. Мәзірдің негізі - қалдықсыз асүй тәсілі: ресурстарды тиімді пайдалану және әдетте қажетсіз деп танылатын шикізатты қайта өңдеу, деп хабарлайды Tengri Travel.

Өнерден асүйге дейін: Barceló-да не ойлап тапты?

Turkiyede is Dunyasi мәліметінше, жоба "Тұрақты гастрономия және климаттық дағдарыс манифесі" деген атау алды. Ұйымдастырушылар гастрономиялық тәжірибе арқылы климаттың өзгеруіне байланысты проблемаларға, соның ішінде орман өрттеріне, мұздықтардың еруіне және биоәртүрліліктің азаюына назар аударуды көздеген.

Instagram-дағы бұл жазбаны көру

A post shared by devridaim (@devridaimenstitusu)

Гастрономиядағы қалдықсыз тәсіл өнімдер мен басқа да ресурстарды барынша тиімді пайдалануды және қоқысқа тасталатын қалдық мөлшерін азайтуды көздейді. Бұл көбіне пайдаланылмай қалатын ингредиенттер мен өнім бөліктерін қайта өңдеуді қамтуы мүмкін.

Barceló Istanbul акциясының сипаттамасында мәзірдің алты кезеңінің әрқайсысы үшін нақты қандай ингредиенттер қолданылғаны көрсетілмеген.

Гастрономиялық шара Barceló Hotel Group-тың Atıktan Sanata - "Қалдықтан өнерге" деп аталатын кең ауқымды экологиялық бастамасының бір бөлігі болды. Жоба аясында қонақүйдің пайдаланылған тоқыма бұйымдары Каппадокия өсімдіктерінен алынған табиғи бояулармен, сондай-ақ Barceló Cappadocia қонақүйінің асүйінде қалған шай мен кофе қалдықтарымен боялып, өнер туындыларына айналды.

Әдетте қоқысқа тасталатын өнімдерді пайдалану келушілер тарапынан түрлі пікір тудыруы мүмкін. Agriculture and Human Values журналында жарияланған зерттеуде ғалымдар қонақүй және мейрамхана бизнесі өкілдерінің тағам қалдықтарын азайту тәжірибесін енгізуден неге қашқақтайтынын зерделеді.

Авторлардың айтуынша, қонақтар мұндай бастамаларды тағамның төмен сапасымен немесе үнемдеуге тырысумен байланыстыруы мүмкін. Осыған байланысты, мейрамханалардың негізгі мақсаты қалдықтарды азайту және ресурстарды ұқыпты пайдалану болса да, олар теріс көзқарасқа тап болу қаупіне ие.

Ғалымдар өз еңбектерінде швейцариялық мейрамханада болған жағдайды сипаттаған: қонақтардың бірі тағамның артылып қалған азық-түліктерден дайындалғанын білгенде, одан бас тартқан. Оның пікірінше, мұндай ас "қоқыстан" жасалған.

Зерттеушілер әдетте тасталатын өнімдерді пайдалану қалдық көлемін азайтуға көмектесетінін атап өтті. Алайда мейрамханалар келушілердің теріс реакциясынан қорқып, мұндай шешімдерді енгізуге әрдайым дайын бола бермейді.

Тағы оқыңыз: Астанадан Michelin мейрамханасына дейін. Парижді бағындырған қазақстандық қыздың хикаясы

Бізді Google-дың негізгі дереккөздер тізіміне қосыңыз