Агенттік Мәжілісте Рейтингтік қызмет туралы заң жобасын таныстырды

Қазақстан Республикасы Парламентінің мәжілісінде «Рейтингтік қызмет туралы» заң жобасының таныстырылымы өтті.
Қаржы нарығын реттеу және дамыту агенттігі Төрағасының орынбасары Мария Хаджиева баяндама жасады.

Заң жобасы Қазақстан Республикасының қаржы секторын дамытудың 2030 жылға дейінгі тұжырымдамасын іске асыру шеңберінде әзірленді және кредиттік рейтингтік агенттіктердің қызметін реттеу үшін толыққанды құқықтық негізді қалыптастыруға, сондай-ақ ұлттық рейтингтік индустрияны дамытуға бағытталған.

М.Хаджиева өз сөзінде кредиттік рейтингтік агенттіктер ақпараттық асимметрияны төмендетуге, капитал нарықтарының ашықтығы мен тиімділігін арттыруға, сондай-ақ инвесторлардың мүдделерін қорғауға ықпал ете отырып, қаржы нарығында маңызды инфрақұрылымдық рөл атқаратынын атап өтті. Сонымен қатар, қазіргі уақытта Қазақстанда осы саланы кешенді заңнамалық реттеу және жергілікті рейтингтік агенттіктерді дамыту үшін жағдайлар жоқ.

«Заң жобасы Агенттікке танылатын кредиттік рейтингтік агенттіктерді реттеу және қадағалау бойынша өкілеттіктер беруді, тану және қадағалау рәсімдерін регламенттеуді, кредиттік рейтингтік агенттіктердің жауапкершілігін арттыру үшін құқықтық негіз құруды, жергілікті рейтингтік агенттіктің пайда болуы үшін жағдайлар жасауды және реттеуді халықаралық стандарттармен үйлестіруді көздейді», – деп атап өтті М.Хаджиева.

Заң жобасында рейтингтік агенттіктерді қазақстандық, халықаралық және шетелдік агенттіктерге жіктеу енгізіледі, біліктілік талаптары мен оларды тану шарттары белгіленеді. Рейтингтердің тәуелсіздігі мен объективтілігін қамтамасыз етуге бағытталған меншіктің әртараптандырылған құрылымы бар қазақстандық рейтингтік агенттіктің пайда болуы мен орнықты жұмыс істеуі үшін жағдай жасауға ерекше назар аударылды.

Бұдан басқа, құжатта корпоративтік басқаруға, ішкі бақылауға, басшы қызметкерлердің іскерлік беделіне қатаң талаптар, сондай-ақ мүдделер қақтығысын болдырмау және рейтингтік қызметтің жариялылығын арттыру жөніндегі шаралар көзделген.

«Осы Заңның қабылдануы Қазақстанда рейтингтік индустрияны дамыту үшін құқықтық негіз құруға, кредиттік рейтингтік агенттіктердің қызметін тиісті реттеу мен қадағалауды қамтамасыз етуге, сондай-ақ ұлттық заңнаманы IOSCO халықаралық стандарттарымен үйлестіруге мүмкіндік береді», – деп атап өтті Төрағаның орынбасары.