Әйелдер мен балалар қауіпсіздігі назардан түспейді

Астанадағы Ұлттық академиялық кітапханада Халықаралық «16 күн зорлық-зомбылықсыз» акциясына арналған дөңгелек үстел жиыны ұйымдастырылды. Бұл Президент жанындағы Әйелдер істері және отбасылық-демографиялық саясат жөніндегі Ұлттық комиссияның ұйымдастыруымен, БҰҰ-Әйелдер құрылымының техникалық қолдауымен өткізілді.

Іс-шара мемлекеттік органдар, халықаралық ұйымдар, сарапшылар қауымдастығы және азаматтық қоғам институттарының өкілдерін біріктірді. Қатысушылар әйелдер мен ба­лалардың қауіпсіздігін нығайту бойын­ша жүйелі шараларды, сондай-ақ осы саладағы мемлекеттік саясатты одан әрі жетілдіру жолдарын талқы­лады.

­«16 күн зорлық-зомбылықсыз» акциясы жыл сайын 25 қарашадан 10 желтоқсанға дейін әлемнің 90-нан аса елін­де өткізіледі және қоғамның зорлық-зом­былық мәселесіне хабардарлығын арт­тыруға, зорлыққа нөлдік төзімділік мәдениетін қалыптастыруға бағыт­тал­ған. Қазақстан дәстүрлі түрде бұл бас­таманы қолдайды, ал Ұлттық комиссия еліміз бойынша іс-шараларды үйлес­тіріп, мемлекеттік органдар, үкі­мет­тік емес ұйымдар және азаматтық қоғам институт­тарының күш-жігерін біріктіре­ді.

Дөңгелек үстелдің модераторы – Ұлттық комиссия төрағасының орынбасары, Ұлттық кеңес мүшесі, адвокат, құқық қорғаушы Айман Умарова. Іс-шарада Конституциялық кеңес төрайымы Эльвира Азимова, Қазақ­стандағы БҰҰ-Әйелдер құрылы­мының өкілі Джерен Гювен Гюрэс және ҚР Адам құқықтары жөніндегі уәкілі Артур Ластаев сөз сөйледі.

Сондай-ақ жетекші сарапшылар мен мемлекеттік органдардың өкілдері баяндама жасады. Бас прокурордың орынбасары киберзорлықтың қазіргі қатерлері және прокуратура тарапынан қабылданып жатқан жауап шаралары туралы баяндады. «One-Stop-Service» жобасының үйлестірушісі Ляззат Ракишева Ұлттық комиссия бастамасын іске асыру тәжірибесімен бөлісті. Әділет вице-министрі әйелдер мен балаларды қорғауға қатысты жаңа заңнамалық шараларды талқылады. Ал Зульфия Байсакова дағдарыс орталықтарының бірінші қорғау желісі ретіндегі рөлін және ерте араласудың маңыздылығын атап көрсетті. Ұлттық комиссияның төраға орынбасары Елена Тарасенко мемлекет, үкіметтік емес ұйымдар, халықаралық ұйым­­дардың 1 325 резолюциясы ая­сын­дағы серіктестігі туралы айтып берді. Заң ғылымдарының докторы Марат Қоғамов қылмыстық процес­те әйелдердің қатысу ерекшеліктерін түсіндіріп өтті. Баян Жандосова зорлық құрбандарын қалпына келтіру тәжіри­бе­сімен бөлісті.

Арнайы назар репродуктивті ден­саулықты қорғауға, әйелдердің эко­номикалық дербестігін арттыруға, әкелерді профилактикалық жұмысқа белсенді тартуға, сондай-ақ қауіпсіз қоғам қалыптастыруға арналған цифр­лық платформаларды дамытуға бағыт­талмақ. Бір мезетте ведомстволар арасындағы өзара іс-қимылды күшейту және азаматтық қоғам институттарымен тиімді әріптестік орнату мәсе­ле­лері де – басты назарда.

Ұлттық комиссияның мәлімдеуін­ше, зорлық-зомбылыққа нөлдік төзім­ді­лікті қалыптастыру – ұзақмер­зім­ді әрі жүйелі тәсілді талап ететін үдеріс. Бұл бағытта құқықтық мәдениетті дамы­ту, мем­лекеттік органдар, сарапшылар қауым­дастығы және үкіметтік емес ұйым­дардың күш-жігерін біріктіру шешуші рөл атқарады.

Дөңгелек үстел соңында әйелдер мен балаларды қорғау бастамаларын ілгерілетудегі үлесі үшін белсенді қатысушылар мен сарапшыларға Алғысхат табыс етілді.