Алатау полигонындағы өрттен кейін қалада жаңа нормалар бекітіледі

Тиісті жоба «Ашық НҚА» порталында талқылауға шығарылды. Оны Алатау қаласының тұрғын үй-коммуналдық шаруашылық және тұрғын үй инспекциясы бөлімі әзірлеген.

Жоба шешімімен коммуналдық қалдықтардың түзілуі мен жиналу нормаларын, сондай-ақ қатты тұрмыстық қалдықтарды жинау, шығару және көмуге арналған тарифтерді бекіту көзделеді. Негізгі міндеттері:

— қалдықтарды шығару және кәдеге жарату жөніндегі ұйымдардың қызметін қаржыландырудың экономикалық тұрғыдан негізделген тетігін құру;

— елді мекендердің санитарлық жағдайын сақтау және рұқсат етілмеген қоқыс орындарының пайда болуының алдын алу;

— экологиялық қауіпсіздікті арттыру және қалдықтардың қоршаған ортаға теріс әсерін азайту.

Жоба 2025 жылдың 6 қарашасына дейін талқылауда болады.

Еске салайық, Алатау қаласының қатты тұрмыстық қалдықтар полигонында бір аптаға жуық өрт болды.

Ірі өртке байланысты Алатауда жергілікті ауқымдағы техногендік сипаттағы төтенше жағдай режимі енгізілді.

Кейін бұл полигон жабылуы мүмкін екені хабарланды.