Албаниядағы рейтингтік жарыста қазақстандық қос балуан қола алды

Рейтингілік жарыста Ризабек Айтмұхан үшінші орын үшін белдесуде Үндістан өкілі Джойнти Кумарды небәрі 23 секундтың ішінде 10:0 есебімен тізе бүктіріп, турнирдің қола медаліне қол жеткізді. Бұған дейін жартылай финалда Ризабек ресейлік спортшы, екі дүркін Олимпиада, бес дүркін әлем чемпионы Абдулрашид Садулаевқа 3:14 есебімен есе жіберген еді.

Ал Азамат Дәулетбеков үшінші орын үшін тағы бір отандасымыз Камиль Куруглиевті 4:0 есебімен жеңді. Жарыс барысында ол ирандық Амирхоссейн Фирузпурге жол берді. Кейін Фирузпур финалға шығып, алтын медаль ұтып алды. Соның нәтижесінде Азамат жұбаныш белдесуі арқылы қола медаль үшін күресуге мүмкіндік алды.

Айта кетсек, бұған дейін Болат Сақаев (86 келі) үздік үштікті түйіндеді.

Ал Зейнеп Баянова (50 келі), Лаура Алмағанбетова (55 келі) алтын медальға таласады.

Жарыс 25 ақпан мен 1 наурыз аралығында өтеді. Қазақстан бұл додада күрестің барлық түрінен сынға түседі.