Әлемде 589 млн адам диабетке шалдыққан

Әлемде әр тоғызыншы адам диабетке шалдыққан, деп хабарлайды 24KZ. Бұл 20-дан 79 жасқа дейінгі 589 миллион адам. Халықаралық диабет федерациясының дерегі осындай. Бұл көрсеткіш 2050 жылға қарай, 853 миллионға жетуі мүмкін. Дүниежүзілік қант диабетіне қарсы күрес күні дәрігерлер осылай деп дабыл қақты. 

Қант диабетінен жыл сайын 3,5 миллион науқас көз жұмады. Эндокриндік кесел негізінен жүрек-қан тамырлары аурулары, бүйрек жеткіліксіздігі, жүйке жүйесінің зақымдануы және көру қабілетінің нашарлауы сияқты асқынулармен байланысты. Былтыр әлемдік денсаулық сақтау саласында қант диабетімен күрес шараларына кеткен шығын көлемі шекті сомадан асып, 1 триллион АҚШ долларына жетті.

Питер Шварц, Халықаралық диабет федерациясының президенті:

- Қант диабетімен ауыратын 10 адамның төртеуіне әлі де диагноз қойылмағанын ескерсек, скрининг пен ерте диагностикаға басымдық берілу керек. Бұл дертке салғырт қараудың салдары ауыр болуы мүмкін.

Биыл диабетпен қарсы күрес шараларының басым бөлігі диабеті барлар үшін жұмыс орнында қиындық келтіретін мәселелерді оңтайлатуға бағытталған. Әлемде әр 10 ересек адамның жетеуі, яғни 412 миллион адам еңбекке жарамды. Оларға жұмыс барысындағы түрлі күйзеліс, уайымға салыну кері әсер етуі мүмкін. Зерттеулерге қарағанда диабеті бар науқастардың 30%-і үнемі бақылау, талап ету салдарынан депрессияға түскіш келеді.  

Аарон Бридлав, психолог:

- Адамдар бұл аурумен күресуге және оны жеңуге саналы түрде талпыну керек. Өз бетінше тыныс алу жұмысын жақсартатын жаттығуларды үнемі жасап отыру маңызды. Жақын адамдарының қолдауы да көп рөл ойнайды.

Қант диабетіне шалдыққан науқас санының күрт артуына шетелдік мамандар алаңдаулы. Олар әлем елдерін бұл мәселеге бейжай қарамай, денсаулық сақтау саласына қаражат бөліп, профилактикалық бағдарламаларды көптеп енгізуге шақырады. Бұл дертті ерте анықтап, тиісті шаралар қабылдау үшін маңызды.

Авторлары: Фариза Жанғанаева, Айжан Оспан