Әлемдегі цифрлық қызметтердің озық үлгілері

Бүгінде әлем елдері қағазбастылықтан арылып, автоматтандырылған жүйелерді жан-жақты енгізуге ден қойған.

Бұл әсіресе қаланың қауырт тіршілігін жеңілдетіп, уақытты үнемдеуге мүмкіндік береді. Сондай-ақ ашықтық пен тиімділіктің нышанына айналған. Жаһандағы электронды қызметтердің озық үлгілеріне үңілейік.

Шанхай мен Сингапур арасында іске қосылған жаңа онлайн жүйе шетелдік инвесторлар үшін үлкен жеңілдік әкелді. Енді кәсіпкерлер Шанхайда компанияны толық онлайн тіркей алады. Бұрын олар орталыққа барып, құжаттарды міндетті түрде қолмен тапсыруы керек еді. Бұл екі шаһар арасындағы цифрлық тұлғаны өзара мойындаудың алғашқы тәжірибесі және кедергілерді азайтуға бағытталған маңызды қадам. Жоба «Бір белдеу, бір жол» елдерімен кеңейтіліп, трансшекаралық бизнес ашуды жеңілдете түспек. Бұдан бөлек, Қытай–Еуропа автоиндустриясында деректер сенімділігі бойынша пилоттық жобалар таныстырылды. Бұл бастама сыртқы сауда компанияларына қауіпсіз әрі жылдам цифрлық қаржылық қызметтерді кеңейтуді көздейді. Шанхай бүгінде цифрлық экономиканы дамыту мен кәсіпкерлер үшін қолайлы жағдай қалыптастыруда көшбасшы шаһарға айналған. 

Әзербайжан Мәдениет министрлігі кино саласында жаңа электрондық қызметті іске қосты. Енді фильмдерді мемлекеттік тізілімге тіркеу және дистрибуцияға рұқсат алу процесі "MyCulture" бірыңғай порталы арқылы онлайн жасалады. Бұл елдің 2024–2026 жылдарға арналған "e-Culture" стратегиясындағы маңызды бағыттың бірі. Жүйе құжат тапсырғанда өтініш беруді жеделдетіп, барлық қызметті толық автоматтандырады. Яғни продюсерлер, дистрибьюторлар және кинотеатрлар рұқсатын кез келген жерде, кез келген уақытта ала алады. Жаңа қызмет шетелдік кинокомпаниялардың Әзербайжан нарығына кіруін де жеңілдетеді. Бұл халықаралық кино айналымын арттырып, жаңа ынтымақтастықтарға жол ашпақ.

Финляндия болса мемлекеттік қызметтерді цифрлық жүйеге көшірумен қатар, шешім қабылдауда адам факторының азаюын қолдайды. Бүгінде ел әлемдегі жемқорлық деңгейі ең аз мемлекеттердің бірі. Аймақтағы мемлекеттік қызметтер Suomi.fi жүйесі арқылы іске асады. Онымен азаматтар мен кәсіпорындар салық төлеу, денсаулық сақтау, білім алу және басқа да қызметтерге онлайн қол жеткізе алады. Платформа 2025 жылғы GovTech Prize марапатын иеленіп, әлемдегі ең үздік цифрлық мемлекеттік қызмет ретінде ресми танылды. Бұл марапат ең инновациялық және қоғамға көп әсер еткен цифрлық жобаларға беріледі. Оның мақсаты - мемлекеттік қызметтердің сапасы мен тиімділігін арттырып, азаматтар мен ұйымдардың өмірін жеңілдету. Биылғы додада әлемнің түрлі елдерінен қатысқан жобалардың арасынан Suomi.fi адам мен мемлекет арасындағы ашық байланыстың көпіріне айналған қызмет ретінде дараланды.  

Әйгерім Ардаққызы