Алғыс айту күні тарихи тағдырлар сабақтастығын еске салады

Алғыс айту күні – қоғамдағы өзара түсіністік пен кеңпейілдіктің белгісі. XX ғасырдағы тарихи қиындықтар кезінде Қазақстанға түрлі этностар қоныс аударды, ал жергілікті халық жаңа қоныс аударғандарға қамқорлық көрсетті, оларға қолдау білдірді. Сол тәжірибе бүгінгі күнге дейін елдің, мәдени және әлеуметтік бірлігінің негізін қалыптастырады.

2025 жылғы Ұлттық статистика бюросының дерегі бойынша Қазақстанда 130-дан астам этнос бейбіт өмір сүріп жатыр. Елде қазақтардың саны - 14,4 млн, орыстар - 2,96 млн, өзбектер - 678 мың, украиндар - 372 мың, ұйғырлар - 306 мың. Сондай-ақ немістер, татарлар, әзербайжандар, корейлер, түріктер, дүнгендер, белорустар, тәжіктер және татылар да жүзден астам түрлі этностар бейбіт өмір сүріп жатыр. Бұл көп түрлілік - Қазақстандағы қоғамдық келісім мен мәдени толеранттылықтың негізі кепілі.

Бүгінгі таңда Алғыс айту күні еліміздің барлық аймағында түрлі іс-шаралармен – қайырымдылық акциялары, мәдени-көркем бағдарламалар, білім беру ұйымдарында ашық сабақтар мен тәрбиелік сағаттар арқылы өткізіледі. Бұл мереке азаматтық жауапкершілік пен адамгершілік құндылықтарды дәріптейді, қоғамдағы сенім мен өзара сыйластықты нығайтады.

Алғыс айту күні – әр жүректегі мейірім мен татулықтың мерекесі. Ол бізді өткенге тағзым етуге, бүгінгі бейбіт өмірдің құндылығын сезінуге және болашақта да бірлігімізді сақтауға шақырады.

Мерекеге орай Астана қаласы өзбек этномәдени орталығының төрағасы, Республикалық медиация кеңесінің төрағасы, Ұлттық Құрылтайдың, Қазақстан халқы Ассамблеясы кеңесінің және ҚР Мәдениет және ақпарат министрлігі Қоғамдық кеңесінің мүшесі Шерзод Пулатов пікірін білдірді.

– Қазақстандағы Алғыс айту күні бірқатар тарихи оқиғаға және ата-бабаларымыздың терең халық даналығына негізделеді. Қазақ халқында өте дәл әрі дана нақыл сөз бар: «Адамға алғыс айтпаған, Құдайға шүкіршілік етпейді», яғни адам адамға алғыс айта білмесе, Жаратушыға шынайы шүкір ете алмайды. Абай Құнанбайұлы да өзінің «Қара сөздерінде» мейірім, алғыс айту және адамдарға жақсылық жасау адамгершіліктің негізі екенін атап өткен. Бұл сөздерде терең өнегелік мән жатыр: бір-бірімізге бейбітшілік пен жақсылық үшін алғыс айту, өзара құрмет пен қолдау көрсету – үйлесімді қоғамның іргетасы.

Қазақстандағы Алғыс айту күні – жай ғана күнтізбедегі дата емес, тарихи жады мен өзара құрметтің маңызды қоғамдық символы. Ол бізге әр жылдары елімізден пана тауып, шаңырақ құрған миллиондаған адамдардың тағдырын және қиын кезеңдерде кең пейіл танытқан қазақ халқының адамгершілігін еске салады. Қазақстандағы Алғыс айту күні дәл осы құндылықтар туралы – ризашылық мәдениеті, өзара сыйластық пен адам қадірі жайлы. Біз бір-бірімізге бейбіт өмір үшін, мейірім үшін, түсіністік пен қолдау үшін алғыс айтамыз, - деді.

Осы орайда ол еліміздегі барлық этностың татулықта өмір сүріп, бірлікті қадірлеп, Қазақстанның болашағын бірге құрып жатқаны үлкен жетістік екенін атап өтті. Қазақстандағы қоғамдық келісімнің үлгісі тек мемлекеттік саясат емес, бұл күнделікті адамдардың, ақсақалдар кеңестерінің, аналар кеңестерінің, медиация саласындағы мамандардың, сондай-ақ жастар мен этномәдени бірлестіктердің бірлескен еңбегі.

- Алғыс айту осы жұмыстың адамгершілік іргетасына айналып, көп түрліліктегі бірлік рухын қалыптастырады. Бұл мереке бізге тағы да еске салады: алғыс – жай сөз емес, ол қоғамдық сенімнің негізі. Осы күні ерекше алғыс сөздерімізді еңбек адамдарына арнағымыз келеді. Жұмысшылар, мұғалімдер, дәрігерлер, құрылысшылар, диқандар, жүргізушілер, коммуналдық қызметкерлер мен мемлекеттік қызметшілер – адал еңбегімен ел дамуына үлес қосып жүрген барлық жандар құрмет пен ризашылыққа лайық. Олардың күнделікті еңбегі қоғамның игілігін нығайтып, Қазақстанның болашағын бекемдейді. Барша қазақстандықтарды Алғыс айту күнімен құттықтаймын! Жүрегімізде әрдайым шынайы «рахмет» айтуға орын болсын, елімізде бейбітшілік пен келісім басты құндылық болып қала берсін, өзара құрмет бізді одан әрі нығайтсын. Баршаңызға зор денсаулық, амандық және ортақ Отанымыз – Қазақстанның гүлденуін тілеймін! – деп атап өтті Астана қаласы өзбек этномәдени орталығының төрағасы.

Айта кетсек, алғыс айту күніне орай астаналық оқушылар ерекше челлендж ұйымдастырды.