Алматы камералары көлікте телефон ұстаудың 1 мыңнан астам дерегін тіркеді

Биыл 12 наурыздан бастап ҚР Әкімшілік құқық бұзушылық туралы кодексінің 31-бабына ҚР Цифрлық кодексі аясында қабылданған өзгерістер күшіне енді. Ол бойынша оның ішінде көлік құралын басқару кезінде ұялы телефон пайдалану және қауіпсіздік белдігін тақпау деректерін тіркей бастады.

Бұрын автоматты жүйелер жылдамдықты арттыру, бағдаршамның тыйым салатын сигналына өту, жол белгілері мен таңбаларын сақтамау, дұрыс тоқтамау немесе тұрақ ережесін бұзу, озу қағидаларын бұзу және жаяу жүргіншілерге жол бермеу сынды 6 түрін ғана анықтайтын.

Жаңа ережелер күшіне енген соң, камералардың шын мәнінде мұндай деректерді тіркемейтіні туралы әлеуметтік желіде пікір мен болжамдар айтылды. Жағдайды нақтылау үшін агенттік Алматы қаласының полиция департаментіне жүгінді.

Мегаполис полициясының жауабына сәйкес, 2026 жылдың наурыз айында Алматы қаласы бойынша ҚР ӘҚБтК-нің 591-бабы бойында көлік жүргізіп келе жатып телефон қолданған 1 мың 242 көлік жүргізушісі әкімшілік жауапкершілікке тартылған. Осы уақыт ішінде ҚР ӘҚБтК-нің 593-бабы бойынша қауіпсіздік белдігін тақпаудың 1 мың 646 дерегі тіркеліп, оларға тиісті айыппұл салынған.

Еске салайық, Алматыда полицияның бірыңғай бейнемониторинг жүйесіне 62 мың 791 бейнекамера қосылған. Жыл соңына дейін тағы 30 мың бейнекамераны қосу жоспарланып отыр. Жалпы қалада 186 мың бейнебақылау камерасы жұмыс істеп тұр.