Алматы облысында әскери ұшқыштар шеберлігін шыңдап жатыр

Елдегі әуе қорғанысы күштерінің авиациялық бөлімдері жаңа жылды тәжірибелік сабақтан бастады.

Жас ұшқыштар түрлі әскери ұшақтар мен тікұшақтарды тізгіндеп, шеберлігін шыңдап жатыр. Былтыр жоғары оқу орнын аяқтаған жеке құрам біліктілігін арттырып, тапсырманы мінсіз орындауға тырысады.

Қыс мезгілі тікұшақ тізгіндеген ұшқыштар үшін оңай емес. Төмен температура, ылғал ауа, атмосфералық қысымның күрт өзгеруі экипаж үшін үлкен сынақ. Одан бөлек авиациялық техниканы күтіп, баптау керек. Әуе базасында ресейлік Ми-35М, Ми-8/17 тікұшақтары, америкалық Bell UH-1 және еуропалық EC-145 бар. Жас ұшқыштардың көктегі тәжірибесі 300 сағаттан аспайтындықтан тапсырма да қарапайым. Ең бастысы,  техниканы мінсіз басқару керек. Олар жеңіл маршрут бойынша жүріп, уақыттан кешікпей ұшып келуі керек.

Рамазан Молтай, ҚР Әуе қорғанысы күштері «Жетіген» авиациялық базасының ұшқышы:

- Қазіргі таңда мен осы «EC-145» вертолетында ұшқыш болып саналамын. Маған бұл техниканы үйрету үшін инженер, қамтамасыз ету бөлімі өте қатты көмектесті және де маған білімгер ұшқыштар көмектесті. Бұл техникада мен ары қарай ұшуды жоспарлап отырмын. Бұл техниканың айырмашылығы өте жылдам, өте сирек кездесетін, тек қана мықты жағынан таралған тікұшақ.

Жаттығуға әуе базасының барлық ұшу құрамы қатысады. Әр экипажға нақты міндеттер қойылған. Ұшқыштардың ұшу сағаттарына және кәсіби деңгейіне қарай тапсырма беріледі. Оны орындаған экипаж базаға оралып, тікұшақты келесі экипаж тізгіндейді. Нормативтердің дұрыс орындалуын нұсқаушылар мен борттағы бақылау құралдары тіркейді.

Масат Уайс, 53975 әскери бөлім командирінің міндетін уақытша атқарушы:

- Қазіргі таңда бізде жаңа оқу жылы басталды. Оның мақсаттары – жауынгерлік бойынша біздің ұшқыштарды дайындау және де биыл бізге Ақтөбеден 15 жас түлек келді, лейтенанттар. Олардың мамандықтары – кейбіреуі ұшқыш және техниктер, өз мамандықтарында, лауазымдарында. Олар қазіргі таңда жас түлектің жоспарын өтіп жатыр.

Әуе қорғанысы күштеріне қарасты әскери-көлік авиациясының міндеті – сарбаздарды, қару-жарақ пен техниканы тасымалдау. Сонымен қатар табиғи, техногенді апаттардың салдарын жоюға да қатысады. Қазір әскери әуежай күрделі жөндеуден өтіп жатыр. Енді ауыр ұшақтарды да қабылдайды. Биыл Airbus Military концернінің екінші A400M ұшағы келеді. Келесі жылы қытайлық Shaanxi Y-9 ұшақтарын әкелу жоспарда.

Аршын Кемелжан, Айбек Ақшолақов