Алматы облысында өрт қауіпсіздігі айлығы басталды

Алматы облысында өрт қауіпсіздігі айлығы басталды. Жылыту маусымы кезінде тұрғындарға қауіпсіздік ережелері жан-жақты түсіндіріліп жатыр.

Төтенше жағдайлар департаменті қызметкерлері жергілікті атқарушы органдармен бірлесіп, үй-үйлерді аралау жұмыстарына кірісті.

Жылыту маусымы басталғалы Алматы облысында 89 өрт оқиғасы тіркелді. Екі адам зардап шегіп, біреуі қаза болды. Өрттен 2,5 млн теңге көлемінде шығын келген. Осындай келеңсіздіктің алдын алу үшін өңірлік төтенше жағдайлар департаменті қызметкерлері үй-үйді аралап, дабыл құрылғыларын орнатуға кірісті.

Мәншүк Оразбаева, Алатау қаласының тұрғыны:

- ТЖМ-дер келді, пештің бәрін тексерді. Мұржасынан бастап құдыққа дейін қарады. Квартира болғаннан кейін адамдар пешті қалай болса солай бере салады. Біз соны жөндеуге тырысамыз. Бірақ қанша тырысқанмен жалғызбасты ана болғаннан кейін еркек сияқты істей алмаймыз. Бірақ шүкір, осыны орнатып беріп жатқанына.

Сәуле Абылханова, Алатау қаласының тұрғыны:

- Бұл екінші рет орнатып жатқаны. Көмірмен от жағамыз. Түтін болған кезде датчик сигнал береді. Сол кезде қорғанамыз.

Төтеншеліктерде «Жылыту маумысы – жауапкершілік маусымы» деген ұстаным бар. Олар бүгінге дейін ауылды аймақтар мен саяжай алабында көмірмен жылытылатын үйлерге 148 дабыл құрылғысын орнатқан.

Арман Мәкенов, ТЖД басқарма бастығы:

- Әсіресе көпбалалы, әлеуметтік ерекше саналатын жанұяларға көңіл бөлінеді. Енді жылыту маусымының аяғына дейін әлі 1500-ге жуық датчик орнатамыз деген жоспарымыз бар.

Құтқарушылар мен волонтерлер үйлерді аралау барысында дрондарды пайдаланады. Соның көмегімен мұржасынан түтін шыққан үйлерге барып, өрт қауіпсіздігі қағидаларына бей-жай қарамау керектігін жан-жақты түсіндіріп жатыр.

Авторлары: Ардақ Айбарұлы, Аят Дүйсенбаев, Аманжол Жөңкешов