Алматы орталығында бағдаршамдар жұмыс істемей тұр мәліметтер

Алматының орталық көшелерінде бірнеше бағдаршам бірдей істен шықты. Электр қуатының не себепті өшкенін және оның қашан қалпына келтірілетінін анықтадық, деп хабарлайды Tengri Auto.

Бағдаршамдар қай жерде істемей қалды?

17 шілде күні күндіз Алматы орталығындағы бірнеше адам көп шоғырланатын қиылыстарда бағдаршамдар сөніп қалды. Tengri Auto оқырмандарының мәліметінше, электр қуатының өшуі Абай даңғылы, Назарбаев және Желтоқсан көшелерінің маңын қамтыған.

"Тек Абай мен Желтоқсан көшелерінің қиылысында реттеуші тұр. Қалған учаскелерде жүргізушілерге өз бетінше жол табуға тура келеді. Барлық жерде кептеліс пайда болды", – деді Алматы тұрғыны.

Фото Tengrinews.kz

17 шілде күні сағат 12:35-те "Алатау Жарық Компаниясы" АҚ электр желілерінде технологиялық ақау шыққаны белгілі болды.

"Алмалы ауданының Абай даңғылы, Назарбаев, Бөгенбай батыр және Наурызбай батыр көшелерінің шекарасындағы тұтынушылардың бір бөлігіне электр қуатын беру уақытша шектелді. Сондай-ақ бес бағдаршам нысаны токсыз қалды", – деп хабарлады компания.

Қазір мамандар оқиға орнында жұмыс істеп, апаттың себебін анықтап жатыр.

"Оқиға орнында жедел көшпелі бригада жұмыс істеп жатыр. Электр қуатын қалпына келтірудің болжамды уақыты – 2 сағат", – деп толықтырды компания өкілдері.

Бұған дейін хабарланғандай, 13-17 шілде аралығында желілердегі жөндеу жұмыстарына байланысты қаланың барлық аудандарында жарық өшіріледі. Мекенжайлардың толық тізімімен осы жерден танысуға болады.

Google News арқылы жаңалықтарымызды қадағалаңыз