Алматыда 2030 жылға дейін 935 лифтіні ауыстыру қажет. Бұл қанша тұрады және кім төлейді

Алматыдағы көпқабатты үйлерде 8 420 лифт бар. Соның 10 пайыздан астамын ауыстыру қажет. Жаңа лифт сатып алуға қанша қаражат кетуі мүмкін және бұл шығынды кім өтейді?

Поделиться

Алматыда қанша лифтіні ауыстыру қажет?

Қазір Алматыда 14 523 лифт жұмыс істеп тұр. Бұл туралы қалалық коммуналдық инфрақұрылымды дамыту және тұрғын үй инспекциясы басқармасы Tengri Home сауалына берген жауабында мәлімдеді. Бұл - тұрғын үйлердегі, бизнес-орталықтардағы, сауда және ойын-сауық орталықтарындағы және басқа да нысандардағы лифттердің жалпы саны. Ал көппәтерлі тұрғын үйлерде 8 420 лифт бар.

"Оның ішінде 935 лифт 25 жылдан астам уақыттан бері пайдаланылып келеді. Техникалық регламенттер мен қауіпсіздік талаптарына сәйкес, оларды 2030 жылға дейін міндетті түрде ауыстыру қажет", - деп атап өтті басқармадағылар.

Көпқабатты үйдегі лифтті қалай ауыстыруға болады

Лифтіні ауыстыру - қымбат шаруа. Сондықтан Қазақстанда 2023-2029 жылдарға арналған тұрғын үй-коммуналдық инфрақұрылымды дамыту тұжырымдамасы аясында үйлерді жаңғырту бағдарламасы іске қосылды. Әр өңір мен қалада өз операторы бар, Алматыда бұл - "Алматы тұрғын үй" ЖШС.

Шығын республикалық бюджет есебінен өтеледі. Мемлекет беретін пайызсыз несие арқылы тұрғындар үйдің қасбетін, шатырын, инженерлік желілерін және лифтін жаңарта алады.

"Күрделі жөндеу аяқталғаннан кейін кондоминиум нысанын басқару органы тұрғын және тұрғын емес үй-жай иелерінің жеке шоттары көрсетілген тізімді, сондай-ақ әр үй-жайдың аумағы туралы мәліметті ЖШС-ға ұсынады. Осы деректер негізінде ЖШС бюджет қаражатын қайтару кестесін есептейді. Ай сайынғы төлем мөлшері әр меншік иесінің кондоминиумның ортақ мүлкіндегі үлесіне қарай, яғни өзіне тиесілі үй-жайдың аумағына сәйкес белгіленеді. Қаражат жеті жылдан 15 жылға дейін бөліп төлеу арқылы қайтарылады", - деп түсіндірді басқарма мамандары бағдарлама шарттарын.

Лифт ауыстыру үшін мемлекеттен жеңілдетілген несиені қалай алуға болады?

Бағдарламаға қатысу үшін пәтерлер мен тұрғын емес жайлардың иелері жалпы жиналыс өткізіп, лифт жабдықтарын ауыстыру туралы шешім қабылдауы керек.

"Шешім пәтерлер мен тұрғын емес үй-жай иелерінің жалпы санының кемінде 51 пайызы қолдаған жағдайда қабылданды деп есептеледі. Шешім қабылданғаннан кейін кондоминиум нысанын басқару органы жалпы жиналыстың хаттамасы мен бағдарламаға қатысу туралы өтінімді бюджетке өтінім дайындау үшін ЖШС-ға жолдайды. Жұмыстар бюджет қаражаты есебінен қаржыландырылады, кейін бұл қаражат қайтарылады", - деп атап өтті әкімдік ведомствосынан.

Үйдегі лифтті ауыстыру қанша тұрады?

Басқарма негізгі маркалы лифтілердің бағалары туралы мәлімет берді. Бір данасының орташа құны:

Fuji, Қытай - 15,89 миллион теңге; Fujizy, Қытай - 17,98 миллион теңге; LiftComp, Түркия - 15,24 миллион теңге; Могилевлифтмаш, Беларусь - 15,19 миллион теңге; LGS, Қазақстан (жинақтауыш бөлшектері Қытай мен Кореяныкі) - 13,86 миллион теңге.

"Бір лифттің құны жабдықтың маркасы, шығарылған елі, ғимараттың қабаттылығы, жүк көтергіштігі, аялдамалар саны, техникалық сипаттамалары, монтаждау жұмыстарының күрделілігі және нысанның конструктивтік ерекшеліктері сияқты бірқатар факторды ескере отырып қалыптасады", - деп толықтырды басқарма.

2026 жылы Алматыда қанша лифт ауыстырылады?

2011 жылдан 2025 жылға дейін мемлекеттік бағдарлама бойынша Алматыдағы 1 128 көппәтерлі тұрғын үйде 2 372 лифт ауыстырылды. Шығындардың жалпы сомасы - 18,3 миллиард теңге. 2026 жылы пайызсыз несие бойынша 57 үйде жаңа жеделсатылар орнатылуға тиіс. Онда 105 лифт жаңартылады.

Google News арқылы жаңалықтарымызды қадағалаңыз

Жазылу

Алматы лифт жеделсаты