Алматыда белгісіз адамдар оқушыны жәбірлеген

Алматы облысы, Қарғалы ауылында белгісіз адамдар оқушыға жәбір көрсеткен. Әлеуметтік желілерде күдіктілер болған жайтты видеоға түсірген болуы мүмкін деген ақпарат тарады, - деп хабарлайды Аikyn.kz.

Аудандық білім бөлімі оқиғаның 21 қыркүйекте сабақ уақытынан тыс кезде, жеке үй ауласында болғанын хабарлады. 13 қазанда бұл туралы білген мектеп директоры полицияға шағым түсірген.

Қазір іс ҚР Қылмыстық кодексінің 124-бабының 1-бөлігі — «Он алты жасқа толмаған адаммен жыныстық қатынасқа түсу немесе сексуал сипаттағы өзге де әрекеттер жасау» бабы бойынша тергеліп жатыр.

Оқиғаға қатысты пікір білдірген Оқу-ағарту министрлігі Балалардың құқықтарын қорғау комитеті де тергеу амалдары жүргізіліп жатқанын мәлімдеді.

«Аталған жағдай бойынша тергеу мен қажетті іс-шаралар жүргізілуде. Қылмыстық іс қозғалды. Тергеу органдары оқиғаның барлық мән-жайын анықтап жатыр. Қазір оқиғаға қатысы бар адамдармен жеке түсіндіру және алдын алу жұмыстары жүргізілуде. Кейін облыстық психологиялық қолдау орталығының мамандары тарапынан тиісті көмек көрсетіледі», — делінген комитеттің хабарламасында.