Алматыда электромобильдер саны дизельді көліктерден асып түсуі мүмкін статистика

Алматыда электрмобильдер сұраныс жағынан дизельді көліктермен теңесіп келеді, деп хабарлайды Tengri Auto EnergyProm-ға сілтеме жасап.

Қазақстанның жеңіл автопаркінде әлі де бензинмен жүретін көліктер басым. Биылғы тамызда тіркелген жеңіл көліктердің 88 пайызы немесе он көліктің тоғызы солардың үлесінде болды.

Дизельді жеңіл автокөліктердің үлесі 1,7 пайыз, ал электрмобильдер - 0,5 пайыз шамасында.

Фото: energyprom.kz. Автокөліктердің отын түрі бойынша бөлінісі

Қазақстанның жеңіл автопаркіндегі дизельді көліктердің үлесі біртіндеп азайып келеді: 2022 жылғы тамыздағы 2 пайыздан 2024 жылғы тамызда 1,7 пайызға дейін төмендеді. Ал электрмобильдердің үлесі, керісінше, 0,1 пайыздан 0,5 пайызға дейін өсті.

Дегенмен, ел бойынша жалпы көрсеткіште дизельді жеңіл көліктер саны әзірге айтарлықтай көп: 86,4 мың дизельді көлік пен 26,3 мың электрмобиль бар.

Алайда электрмобильдер біркелкі таралмаған. Олардың жалпы санының 63,3 пайызы немесе шамамен 16,6 мың көлік Алматыға тиесілі. Мегаполисте дизельді жеңіл көліктермен арадағы алшақтық онша үлкен емес: олардың саны 19,5 мың.

Осыған ұқсас жағдай Астанада байқалады: елордада 3,8 мың дизельді жеңіл автокөлік және 3 мың электрмобиль тіркелген.

Мамандардың болжамы бойынша, төмен шығарындылар аймағының (LEZ) енгізілуі көлік таңдауына әсер етуі мүмкін. Бензин және дизельмен жүретін көлік иелеріне пайдаланылған газ жүйесінің жай-күйі мен зиянды қалдықтар деңгейіне көбірек көңіл бөлуге тура келеді.

Бұл ретте тексеріс әдістері қозғалтқыш түріне байланысты болады. Бензинді көліктерде шығарындыдағы иіс газы мен көмірсутек мөлшері өлшенсе, дизельді көліктерде түтін деңгейі бағаланады. Конструкциясына қарай күйе сүзгісі, SCR шығарындыны тазарту жүйесі және оған қатысты датчиктер тексеріледі.

Жыл аяғына дейін LEZ аймағы пилоттық режимде жұмыс істейді: "пилот" аясында кіру ақысы мен ластануға айыппұл салынбайды. Ол аяқталғаннан кейін экологиялық талаптар тұрақты сипатқа ие болуы мүмкін.

Тағы оқыңыз: Бензинмен жүретін көлік немесе электрмобиль: қазақстандықтардың талғамы қалай өзгерді?

Қазақстанда электрмобильмен саяхаттау жеңілдей түседі: 2026 жылы қанша ЭҚС салынады?

Бізді Google-дың негізгі дереккөздер тізіміне қосыңыз