Алматыда кәмелетке толмаған қыздар тіркелген танысу сайты анықталды

Алматыда кілең кәмелетке толмаған қыздар тіркелген танысу сайты анықталды, – деп хабарлайды Aikyn.kz КТК арнасына сілтеме жасап. 

Бойжеткендер Telegram арнасында күмәнді ер адамдармен танысып, өз өміріне қауіп төндіреді дейді прокуратура өкілдері. Сондықтан желіні бұғаттау туралы сотқа жүгінген

— Алматы прокуратурасы «Дайвинчик» атты Telegram арнаны анықтады. Ол желі жас шектеуінсіз жұмыс істеп, кәмелетке толмағандарға қатер төндіруде. Осыған байланысты прокуратура аталған ресурстың заңсыз жұмыс істеп тұрғанын ескере отырып, сотқа Қазақстан Республикасы аумағында қызметін тоқтату туралы талап‑арыз жолдады. Танысуға арналған желіде отыратын жасөспірімдер көп  екен. Бұл сайтқа бүгінде 17 миллионнан аса адам тіркелген. Онда жас шектеуі жоқ. Кіру де тегін. Telegram-арнада балалар ересектермен еркін сөйлесе алады, – дейді прокуратура өкілдері. 

Прокуратура осы танысу сайты арқылы кәмелетке толмаған бір қыздың күмәнді ер адаммен танысып, оның тарапынан құқығына қарсы әрекетке тап болғанын да анықтапты. Қазір осы жағдайға қатысты тергеу жүріп жатыр. 

— Танысу сайттарында, сол «Дайвинчикте» де, жігіттер өзін басқа адам ретінде көрсетіп, бөтен сурет қояды. Содан кейін алдау немесе әдепсіз әрекеттер басталады. Бұл сайтта кәмелетке толмағандар көп отырады. Онда жасқа қатысты еш тексеріс жоқ. Қазір менің құрбыларым да сол желіден шықпайды. Олардың өміріне алаңдаймын. Өйткені танысу сайтында алаяқтар мен педофилдер қаптап отырған секілді, – деді Снежана Коломацкая.