Алматыда туристік нысандарға тактильді модельдер орнатыла бастады

Бұл жоба инклюзивті туризмді дамытуға бағытталған. Әзірге қаладағы бес тарихи ғимаратқа қойылды. 

Тактильді модель көру қабілеті нашар жандарға қаланың сәулет өнерімен қолмен сезіну арқылы танысуға мүмкіндік береді. Енді ерекше туристер Вознесенск кафедралды шіркеуі, Ықылас Дүкенұлы атындағы халық музыкалық аспаптары музейі, Абай атындағы Қазақ ұлттық опера және балет театрының тарихынан хабардар болады. Алматы музейі және Ұлттық ғылым академиясының модельдері де бар. Сәулеттік пішіндер антивандалдық материалдардан жасалған. Тактильді үлгілер ұзақ мерзімді пайдалануға есептелген. Жоба авторларының айтуынша, басты мақсаты – Алматыда қолжетімді әрі жайлы туристік ортаны қалыптастыру. 

Дәурен Ерғалиев, қалалық Туризм басқармасының бөлім басшысы:

– Еуропа елдерінде мұндай тактильді модельдер өте жиі қолданылады. Металлдан, кей жерлерде пластиктен жасалған түрлері де бар. Ал біз осының бәрін біріктіріп,  ортақ нұсқа жасаймыз деп шештік. Ұзақ мерзімге шыдайды, сапалы болып шықты. Қала тұрғындары мен қонақтарын бұл нысандарға ұқыпты қарауға шақырғым келеді.