Алматыдағы түнгі өрт: от тұрғын үйді және көршілес дүңгіршекті шарпыды

Алматының Бостандық ауданындағы Мыңбаев көшесінде орналасқан тұрғын үйде өрт шықты, деп хабарлайды Tengrinews.kz.

Оқиға жексенбіге қараған түні, 30 тамызда болған.

Төтенше жағдайлар министрлігінің алдын ала мәліметінше, өрт екінші қабаттағы пәтердің балконынан басталған. Кейін жалын ғимаратқа жапсарлас орналасқан көкөніс дүңгіршегіне және үшінші қабаттағы пәтердің балконына тараған.

"ТЖМ бөлімшелерінің күшімен өрт оқшауланып, толықтай сөндірілді. Екінші қабаттағы пәтерден 1959 жылы туған әйел медициналық мекемеге жатқызылды", — делінген хабарламада.

Қазір өрттің шығу себебі мен мән-жайы анықталып жатыр.

Еске салайық, бұған дейін Алматының Наурызбай ауданындағы Жүнісов көшесінде орналасқан тұрғын үй кешенінде өрт шығып, тұрғындар эвакуацияланған еді. Құтқарушылар 28 адамды, оның ішінде 13 баланы қауіпсіз жерге шығарды. ТЖМ мәліметінше, оқиғадан қаза тапқандар мен зардап шеккендер болмаған.

Сондай-ақ бұған дейін Қостанайдағы облыстық әкімдік ғимаратында өрт шыққан болатын. Жалын үш қабатты әкімшілік ғимарат пен оның маңында тұрған автокөліктерді шарпыды. Өртті сөндіру кезінде құтқарушылар екінші қабатта болған әйелді аман алып шығып, Апаттар медицинасы орталығының мамандарына тапсырды.

Google News арқылы жаңалықтарымызды қадағалаңыз