Алматылықтар Абай даңғылындағы асфальтты ауыстыру кезіндегі оғаштықты айтты әкімдіктің жауабы

Әлеуметтік желілерде алматылықтар Абай даңғылындағы жол жұмыстарына назар аударды. Қала тұрғындарының айтуынша, бір учаскеде асфальттың үстіңгі қабаты алынған, бірақ ондағы жабынның бір бөлігі жақында ғана жөнделген болатын. Tengrinews.kz тілшісі мән-жайды тиісті басқармадан білді.

"Жаңадан төселген жерін алып тастады": қалалықтар неге ашуланды?

Алматылық Абай даңғылындағы жол жұмыстарының суретін жариялады. Оның айтуынша, жақында Жетісу ықшамауданынан Бауыржан Момышұлы көшесіне дейінгі учаскеде асфальт жаңартылған. Енді жол жұмысшылары Саин көшесінен Момышұлына дейінгі аралықты жөндеуге кірісіп, соның ішінде жаңадан төселген жабынның бір бөлігін де алып тастаған.

"Жаңа бөлігін қоса алғанда, бүкіл үстіңгі қабатты сылып тастады. Егер бүкіл көшенің асфальтын ауыстыру жоспарда болса, онда әлгі бөлікті жөндеудің не қажеті бар еді? Оған қоса, мұның бәрі оқу жылы басталар алдындағы соңғы аптада жасалып жатыр", – деп жазды жарияланым авторы.

Фотодан даңғылдың бір бөлігінде асфальттың үстіңгі қабаты алынғанын, соған қарамастан көлік қозғалысы жалғасып жатқанын көруге болады.

Алматы қалалық жол инфрақұрылымын дамыту басқармасы биыл Абай даңғылының Саин көшесінен Бауыржан Момышұлы көшесіне дейінгі аралығында орташа жөндеу жұмыстары жүргізілетінін хабарлады.

"Бұл учаске тексеру нәтижелері бойынша жөндеу тізіміне енгізілді. Тексеру барысында жолдың шұңқырлануы, жарықтардың пайда болуы және жол жабынының айтарлықтай тозуы анықталды. Қазір дайындық жұмыстары жүргізіліп жатыр", – деп хабарлады ведомство.

Бұл ретте басқарма аталған учаскеде соңғы рет жөндеу жұмыстары 2019 жылы жүргізілгенін алға тартады.

Қазіргі уақытта учаскеде дайындық жұмыстары жүріп жатыр. Жөндеуді 1 қыркүйекке дейін аяқтау жоспарланған.

Дегенмен, басқарма ескі жабынмен бірге неге жақында төселген асфальттың да алып тасталғанын түсіндірмеді.

ЧИТАЙТЕ ТАКЖЕ

Алматыдағы Төле би көшесінде жолаушылар мінген автобус шұңқырға түсіп кетті

Google News арқылы жаңалықтарымызды қадағалаңыз