Алматының медициналық мекемелері неге күшейтілген режимге көшті?

Дәл осы күндері мегаполисте ЖРВИ мен тұмау өршіп тұр. Мұндайда азаматтарға көрсетілетін медициналық көмек қалай ұйымдастырылады деген мәселе күн тәртібіне шығады, деп хабарлайды Egemen.kz.

Бірінші кезекте мамандандырылған Қалалық балалар клиникалық инфекциялық ауруханасында (ҚБКИА) балаларға тәулік бойы көмек көрсетіле бастады. Аурухана негізгі корпус пен екі филиалдан тұрады. Ұйым 18 жасқа дейінгі балаларға инфекциялық аурулар бойынша шұғыл түрде, тегін медициналық көмектің кепілдік берілген көлемі (ТМККК) аясында қызмет көрсетеді.

«Балаларға ЖРВИ мен тұмауға қарсы ем жүргізу үшін инфекциялық ауруханада 536 төсекке арналған 14 бөлімше ашылған, олардың ішінде 48 реанимациялық төсек бар. Соңғы аптадағы төсек қорына түскен жүктеме шамамен 51% болды. Қажет болған жағдайда эпидемиологиялық жағдайға байланысты қосымша қордағы 92 төсек-орын қосылуы мүмкін», дейді Алматы қаласы Қоғамдық денсаулық басқармасы басшысының орынбасары Ләйла Иманғалиева.

Стационарлық жүктеме бойынша балалар арасында алғашқы орында тұмау мен ЖРВИ, одан кейін пневмония тұр. ҚБКИА стационарларында ЖРВИ және тұмаумен 274 бала емделіп жатыр, олардың 139-ына пневмония диагнозы қойылған. Ауруханада инфекцияларды жедел анықтауға мүмкіндік беретін зертхана бар.

С.Жекенова атындағы қалалық клиникалық инфекциялық ауруханада ересек тұрғындарға медициналық көмек көрсетіледі. Мұнда ЖРВИ және тұмаумен ауыратындарға арналған 280 төсегі бар 5 бөлімше жұмыс істейді, оның ішінде 9 төсек – реанимацияда. Қажет болған жағдайда қосымша 100 төсек ашылуы мүмкін. 2025 жылдың 17 қарашасындағы жағдай бойынша стационарда 203 ЖРВИ диагнозы бар науқасқа қоса, пневмониядан 6 ересек адам ем қабылдап жатыр.

Ал №4 қалалық перзентханада жүкті әйелдерге мамандандырылған көмек көрсетіледі. Жүктілігі 28 аптадан асқан әйелдерге ЖРВИ мен тұмауға қарсы ем жүргізуге арналған 70 төсек ашылған, олардың ішінде 6 реанимациялық төсек бар. Эпидемиологиялық жағдайдың өзгеруіне қарай қосымша 10 резервтік төсек ашуға мүмкіндік бар.

Қоғамдық денсаулық сақтау басқармасы төсек-орын қорын бақылап отырады. Инфекциялық стационарларда резервтік төсек қоры қарастырылған. Қажет болған жағдайда төсек санын жедел арттыруға болады. Медициналық ұйымдар төсек қорын қайта бейімдеу, ем алушыларды бағыттау жоспарларын әзірлеген, бұл эпидемиологиялық жағдайда жедел әрекет етіп мүмкіндік береді.

«Емханаларда емделушілерге ЖРВИ мен тұмауға «фильтр-кабинеттер» арқылы көмек көрсетіледі. Онда инфекция белгілері бар адамдарды қабылдап, аурудың таралу қаупін азайтады. Сондай-ақ үйге шығатын мобильді бригадалар жұмыс істейді. Бастапқы медициналық санитарлық көмек жүйесі маусымдық сырқаттанудың өсу кезеңінде күшейтілген бақылаумен жоспарлы режимде қызмет атқарады», деді спикер.

Жүкті әйелдер мен бір жасқа дейінгі балаларға ерекше көңіл бөлінеді. Бұл санаттағы науқастар үйге шақыртқанда бірінші кезекте қабылдап, тұрақты патронаж және қажет болған жағдайда уақтылы шаралар ұсынылады.