Әлназарова: Жекеменшік клиниканың қызметін МӘМС есебінен алуға болады

Қазақстанда медициналық қызметтердің қолжетімділігіне қатысты шағымдар көбейген, деп хабарлайды Egemen.kz.

Пациенттер талдау тапсыру, КТ мен МРТ секілді зерттеулерден өту үшін апталап, кейде айлап кезек күтуге мәжбүр. 

Мәжіліс депутаттары денсаулық сақтау министрі Ақмарал Әлназарованың атына жолдаған сауалында соңғы жылдары медициналық қызметтер бағасының өскенін, ал қолжетімділіктің екі есеге төмендегенін атап өтті. Олардың айтуынша, мемлекеттік клиникаларда қызмет көрсету мерзімдері созылып кеткендіктен, азаматтар жеке орталықтарға жүгініп, ақылы зерттеулерге ақша жұмсауға мәжбүр.

Депутаттар егер қажетті қызметті мемлекеттік ұйым көрсете алмаса, пациенттерді жеке клиникаларға жолдап, шығынды міндетті медициналық сақтандыру қоры есебінен өтеуді ұсынды.

Депутаттық сауалға жауап берген Денсаулық сақтау министрлігі клиника 10 күн ішінде қажетті қызметті ұсына алмаса, пациент басқа медициналық ұйымға кедергісіз өте алатынын мәлімдеді.

«Егер пациент қордың реестріндегі жеткізушілер қатарында болса, ол қажетті қызметті алу үшін басқа клиниканы таңдауға құқылы. Жолдама рәсімделген кезде таңдалған клиникамен келісімшарт ақпараттық жүйеде автоматты түрде жасалады», – делінген министрлік хабарламасында.

Министрлік мемлекеттік ұйым қажетті қызметті көрсете алмаған жағдайда пациентті жеке клиникаға жіберіп, шығынды міндетті медициналық сақтандыру қоры арқылы өтеу мүмкіндігі қарастырылып жатқанын да атап өтті.

Ұзақ күту, жолдама берілмеуі немесе зерттеу қолжетімсіздігіне байланысты қиындықтар туындаған жағдайда, азаматтарға қордың байланыс орталығына немесе Qoldau 24/7 мобильді қосымшасы арқылы шағымдану ұсынылады.