Алтай ауданында автоматтандырылған сүт фермасы іске қосылады

Шығыс Қазақстан облысында ірі аграрлық жобалардың бірі – жаңа сүт-тауарлы ферма іске қосылуға жақын.
Алтай ауданына қарасты Солоновка ауылында «Елжас» ЖШС 600 басқа арналған заманауи ферма салып жатыр.

Жоба мемлекеттік қолдау аясында жүзеге асуда. Өткен жылы Солтүстік Қазақстан облысының тәжірибесін тарату бағдарламасы бойынша шаруашылыққа 1,2 млрд теңге көлемінде жеңілдетілген несие берілген.

Қазір фермаға симментал және голштин тұқымдарының 400 бас асыл тұқымды ірі қара малы жеткізілді. Сонымен қатар кәсіпорын 10 заманауи ауыл шаруашылығы техникасын сатып алған. Ферма DeLaval компаниясының технологиялық жабдықтарымен қамтамасыз етілген.

Жобадағы сауу залы толықтай автоматтандырылған басқару жүйесімен жабдықталған. Нысан іске қосылуға толық дайын тұр және өңірдегі сүт өндірісін арттыруға мүмкіндік береді.