Алтынемел ұлттық паркінде құлан саны 3500 ден асты

Жетісу облысындағы «Алтынемел» ұлттық паркінде құлан көбейіп келеді, деп хабарлайды 24KZ. Биылғы санақ кезінде олардың саны 3,5 мыңнан асқаны анықталды. Бұл елдегі керқұландардың ең ірі популяциясы деп есептеледі. Парк қызметкерлері бірнеше жылдан бері жабайы жануарларды өзге қорықтарға жіберіп, жерсіндіруге атсалысып келеді.

«Алтынемел» ұлттық табиғи паркіне құландар алғаш рет 1982 жылы «Барсакелмес» қорығынан жеткізілген. Сол кезде олардың саны небәрі 32 бас болатын. Жылдар бойы жүргізілген қорғау жұмыстарының нәтижесінде аталған жануарлардың саны 100 есе артты. Табиғатқа қайта оралған құландар бүгінде даланың сәнін келтіріп, парктің мақтанышына айналды.

Құландардың көптігі сонша қазір әрбір турист оны дүрбісіз-ақ тамашалай алады. Тіпті олар Іле өзенінің бойындағы жазықтан аша тұяқтыларды ығыстыра бастаған. Осы себепті жазық даланың жануарын өзге аймақтарға жерсіндіру және көбейту шаралары жүргізіліп келеді. 

Марғұлан Мұсабеков, «Алтынемел» МҰТП бөлім басшысы:

- Қыркүйек айында 20 бас құлан «Алтындала» резерватына, 17 құлан «Іле Балқаш» резерватына жерсіндіруге жіберілді. Осы 2006 жылдан бері құланды реинтродукциялау жұмыстары нәтижесінде «Алтынемел» ұлттық паркінен 305 бас құлан жіберілді. Бұрынғы мекендеу орталығына жіберілді.

Сонымен қатар саладағылар ғылыми институт өкілдерімен бірлесіп зерттеу жүргізбек. Сол арқылы парк аумағына қанша бас құлан өсіруге болатынын анықтайды. Бұдан бөлек жайылым ауқымын ұлғайту да көзделіп отыр.

Қуат Байтұрбаев, «Алтынемел» МҰТП директоры:

- Ақтау, Қатутаудан құдық қазып, ауыстырсақ па деген ойымыз бар. Сол жақта құдықтарды ашсақ, олар сол жаққа қарай ауысады. Бізде қазір мына жақта жүр ғой. Матай дейді. Бірінші учаскеде жүр ғой. Құланның басы көбейген сайын ол жерде шөптің құнары азайып кетіп жатыр.

1996 жылы ашылған паркте жабайы жануарлардың жүздеген түрі мекендейді. Кейінгі кезде бейнетаспаға қасқыр, түлкімен қатар аю, барыс та жиі түсетін болған. Аң-құстарды қорғау арқылы қорықшылар тұтас табиғаттың тепе-теңдігін сақтауға үлес қосып келеді.

Авторлары: Шыңғыс Қалиден, Қуаныш Түргенбаев