Анонимді шағым: Махамбет аудандық ауруханасында еңбек дауы туындады

Атырау облысындағы Махамбет аудандық ауруханасының бір топ қызметкері ҚР Денсаулық сақтау министрлігіне және облыстық денсаулық сақтау басқармасына анонимді ұжымдық шағым жолдады. Шағымда қызметкерлер медициналық мекеме басшылығы тарапынан еңбек заңнамасының жүйелі түрде бұзылуы, психологиялық қысым көрсету және қызметтік өкілеттіктерді асыра пайдалану фактілері бар екенін мәлімдейді.

Шағымда соңғы шамамен екі ай бойы қызметкерлердің қорқытуға, үрей тудыратын атмосфераға және әділетсіз көзқарасқа тап болып отырғаны айтылған. Өтініш авторларының сөзінше, аурухана басшылығы жұмыс сағаттары мен ставкаларды ешқандай түсіндірмесіз заңсыз қысқартып, қызметкерлерге кәсіби міндеттерін қалыпты атқаруға кедергі келтіретін психологиялық қысым көрсетуде.

Медиктер ставкалардың тең бөлінбегеніне де айтады. Олардың айтуынша, оңтүстік өңірлерден шақырылған дәрігерлер үш ставкамен жұмыс істесе, жергілікті мамандар 1,75 ставкеден артық ала алмайды. Шағым авторлары мұны теңдік қағидатын бұзу және ұжым ішіндегі қақтығыстарға себеп деп санайды.

Сондай-ақ шағымда ынталандырушы және өтемақы төлемдерінің таңдамалы түрде берілуі, мереке күндеріне тиесілі сыйақылардың ұсталып қалатыны немесе қайтарылатыны, сондай-ақ қосымша ақысыз, ставкаға сай келмейтін жүктеме туралы айтылған. Медиктердің айтуынша, аға мейірбике негізсіз баянат хаттар жазып, соның салдарынан қызметкерлердің жұмыс сағаттары қысқартылып отырады.

Шағымдағы тағы бір мәселе — комиссиялар мен аккредитациялар кезінде заңсыз ақша жинау, бұл шағым авторларының пікірінше, заңнаманы тікелей бұзу болып табылады.

Қызметкерлердің мәлімдеуінше, бас дәрігердің орынбасары оларды заңсыз жұмыстан шығару немесе сағаттарын қысқарту арқылы үнемі қорқытады, ал бас дәрігер жағдайдан хабардар бола тұра, нақты шешім қабылдамай, қызметкерлерді қайтадан орынбасарына жолдап отырады. Бұл жағдайда мәселені шешу мүмкін емес.

Ұжымдық шағымда медицина қызметкерлері ҚР Еңбек кодексінің нақты баптарына сілтеме жасайды. Атап айтқанда, жалақыны заңсыз ұстап қалу, қызметкерлерге тең емес қатынас, төленбеген артық жұмыс және психологиялық қысым туралы нормалар көрсетілген.

Осыған байланысты ұжым аурухана басшылығының қызметіне тәуелсіз тексеру жүргізуді, қысым көрсету мен қорқытуды және өкілеттіктерді асыра пайдалануды тоқтатуды; ставкалар мен жұмыс сағаттарын әділ бөлуді қалпына келтіруді; еңбекақыны, соның ішінде ынталандыру мен өтемақы төлемдерін, үстемақылар мен сыйақыларды толық әрі уақтылы төлеуді; сондай-ақ заңсыз ақша жинауды тоқтатуды сұрайды.

Шағым авторлары басшылық тарапынан қысым мен ықтимал қудалаудан қауіптеніп, анонимділікті сақтауды өтінген.

Махамбет аудандық ауруханасының әкімшілігі ҚР Денсаулық сақтау министрлігіне және Атырау облысының денсаулық сақтау басқармасына жолданған анонимді ұжымдық шағымға қатысты пікір білдірді.

Аурухананың хабарлауынша, 2025 жылғы 18 желтоқсанда ұжымның жалпы жиналысы өтіп, онда шағымның мазмұны толық таныстырылған. Талқылау қорытындысы бойынша, әкімшіліктің айтуынша, қызметкерлердің басым бөлігі шағымда келтірілген деректермен келіспей, оларды субъективті және шындыққа жанаспайды деп бағалаған.

— Ставкаларды бөлу және еңбекақыны есептеу ҚР қолданыстағы заңнамасына және Денсаулық сақтау министрлігінің бұйрықтарына сәйкес жүзеге асырылады. Қысым көрсету, заңсыз ақша жинау және өкілеттікті асыра пайдалану фактілері расталған жоқ, — деп мәлімдеді ауруханада.

Сондай-ақ анонимді шағым ұжымның көпшілік көзқарасын білдірмейді деп атап өтілді. Басшылықтың айтуынша, жалған ақпарат әрі қарай таралған жағдайда аурухана әкімшілігі құқық қорғау органдарына жүгіну құқығын қолданбақ.

Айгүл МАНСУРОВА

Бүгін, 14:38