Қараусыз қалған жоқ, жөнделіп жатыр : Махамбет аудандық ауруханасы сынға жауап берді

«Ақ Жайық» газетінде Махамбет ауданы тұрғындарының аудандық емхананың жағдайына қатысты шағымдары жарияланғаннан кейін, аурухана басшылығы ресми түсініктеме берді.

Естеріңізге сала кетейік, бұдан бұрын ауыл тұрғындары ғимараттың жағдайы нашар екенін, ұзақ жылдар бойы жөндеу жүргізілмегенін және санитарлық жағдайдың көңіл көншітпейтінін айтқан еді. Солардың бірі Жақсығұл Ихсанов «Осындай жағдайда науқастарды қабылдау мүмкін емес» деп пікір білдірген.

«Махамбет аудандық ауруханасы» шаруашылық жүргізу құқығындағы мемлекеттік коммуналдық кәсіпорнының медициналық қызмет жөніндегі директор орынбасары И. С. Пернебеков бұл мәлімдемелерді жоққа шығарып, поликлиника жұмысы жалғасып жатқанын және науқастар қабылданып жатқанын айтты. Оның сөзінше, ғимараттың үшінші қабатының кейбір бөлмелері жөндеу жұмыстарына жабылған.

«Науқастар ғимараттың бірінші және екінші қабатында қабылданады. Үшінші қабаттағы кабинеттер осы жылдың ағымдағы жөндеу жоспарына кірген. Жөндеу жұмыстары аяқталғаннан кейін қабылдау толық көлемде қайта жалғасады. Медициналық көмек көрсетуге қажетті барлық жағдайлар қамтамасыз етілген, құрал-жабдықтар жұмыс істеп тұр, санитарлық жағдай бақылауда», — деп түсіндірді Пернебеков.

Оның айтуынша, жөндеу жұмыстары жоспарлы түрде және тиісті қызметтердің бақылауымен жүргізіліп жатыр. Аурухана әкімшілігі сондай-ақ диалогқа ашық екенін, қоғамдық және БАҚ өкілдеріне дұрыс ақпарат беруге дайын екенін айтты.

Анастасия ШЕРСТЯНКИНА

Аурухананың екінші қабатының сурет И. Пернебеков жолдады

Бүгін, 14:12