“Апатқа бірнеше минут қалғанда үлгерді“ Непалдағы мектеп директоры 900 баланы құтқарып қалды

Непалдағы мектеп директоры Раджендра Давади жойқын су тасқыны ғимаратты қиратпас бұрын оқушыларды эвакуациялап үлгерді. Оның айтуынша, сол сәтте мектепте болған барлық бала қауіпсіз биік жерге шығарылды, деп хабарлайды Tengri Life.

Эвакуация қалай өтті?

"Трибхуван Тришули" орта мектебінің 47 жастағы директоры Раджендра Давади болған оқиға туралы Republic World басылымының YouTube арнасына берген сұхбатында айтып берді.

Давадидің сөзінше, сәрсенбі таңғы сағат 9:20 шамасында оған досы қоңырау шалып, мұздықтың құлауы салдарынан көрші ауылды су тасқыны шайып кеткенін хабарлаған.

Бастапқыда директор жағдайды мектепке төнген тікелей қауіп деп санамаған. Үш қабатты бетон ғимарат өзен деңгейінен шамамен 60 метр биіктікте орналасқан еді. Алайда көп ұзамай қызметкерлердің бірі су жылдам көтеріліп жатқанын жеткізді.

"Мен балаларды үйлеріне қайтарғым келді. Сол сәтте есепші жүгіріп келіп: "Төменнен су көтеріліп жатыр!" - деді. Бәрі қас-қағым сәтте басталды. Осыдан кейін бірден сабақ үстінде отырған мұғалім хабарласты: "Су тақап қалды, біз кетіп жатырмыз. Сізге де тезірек қашқан дұрыс болар", - дейді ол.

Осыдан кейін директор оқушыларды дереу эвакуациялау туралы шешім қабылдады. Ол мектеп қоңырауын соғып, мұғалімдерден балаларды сыныптардан шығаруды сұрады. Сондай-ақ Давади мектеп автобустарының жүргізушілеріне кері бұрылып, мектепке жақындамауды бұйырды.

Оқушылар биік төбеге көтерілді. Кейбірі үлкен бодхи ағашының астын паналады.

Директордың айтуынша, ол уақытта мектепте тек жоғары сынып оқушылары болған. Бастауыш сыныптар басқа ауысымда оқитындықтан, ғимараттан кетіп үлгерген еді.

"Ол сәтте ғимаратта тек жоғары сынып оқушылары қалған еді - бастауыш сыныптар басқа ауысымда оқиды, олар кетіп қалған. Сондықтан балаларды эвакуациялау оңайырақ болды, олар жылдам жүгірді. Егер бұл жағдай күндізгі сағат екі-үште, сабақта кішкентай балалар болғанда болса, жағдай өте қиын болар еді. Бірақ жоғары сыныптағылар биікке шығып үлгерді, мен де олармен бірге болдым", - деп толықтырды директор.

Эвакуацияға 20-дан астам мұғалім қатысты. Дегенмен, кейбір қызметкерлер қауіпке байланысты мектептен кетіп қалған.

Давадидің айтуынша, оқытушылардың бірі Сантош Паудель өзі болған үйге су тасқыны соққаннан кейін жоғалып кеткен. Ғимарат қирап қалған, ал мұғалім әлі табылған жоқ.

Мектептің тағы бір қызметкері хабар-ошарсыз кеткендер тізімінде.

"Қасымда 20-дан астам мұғалім қалды. Әрине, кейбірі қорыққаннан қашып кетті - оларды түсінуге болады. Өкінішке қарай, бір әріптесіміз, оқытушы Сантош Паудель жоғалып кетті. Су тасқыны ол болған үйді тікелей соқты. Ғимарат жоқ, ал Сантошты әлі таппадық. Тағы бір қызметкеріміз де жоғалды. Бірақ мен ең соңынан шықтым және нақты білемін: мектептің ішінде ешкім қалған жоқ", - деді ол.

Жергілікті тұрғындар Давадиді батыр санап отыр, бірақ өзі тек міндетін орындағанын айтып, қарапайымдылық танытты.

Раджендра бұл мектепте 23 жыл жұмыс істеген, ал былтыр директоры болды. Кезінде ол өзі де осы мектепте оқыған.

Қазір лай басқан үйінділерге қарап отырып, директор мектепті қалпына келтіргісі келетінін және көмек сұрап билік пен халықаралық ұйымдарға жүгінгенін айтты.

Оның сөзінше, қазіргі басты міндет - балаларға білім алу мүмкіндігін қайтару.

Еске сала кетейік, 26 тамызда Непал мен Тибет шекарасында ауқымды су тасқыны болды. Судың, лайдың және үйінділердің қуатты ағыны Бхотекоши және Тришули өзендері аңғарларындағы елдімекендерге жетіп, үйлерді, жолдар мен көпірлерді қиратты. Апат салдарынан жүздеген адам қаза тауып, тағы жүздегені хабар-ошарсыз кетті.

Бұған дейін Қазақстан СІМ Непалда жоғалғандар арасында 3 отандасымыз бар екенін хабарлаған болатын. Алдын ала ақпарат бойынша, олардың кейбірі Непалдан Қытайға шекара асқан туристік топтың құрамында болған.

Тағы оқыңыз: Тоқаев Си Цзиньпинге көңіл айтты

Google News арқылы жаңалықтарымызды қадағалаңыз