Ақбаян Мұқанғалиеваға қатысты әрі қарай бақылау ұсынылды

Сұлтан Сәрсемалиевтің бұрынғы жұбайы Ақбаян Мұқанғалиева Алматыда стационарлық кешенді психологиялық-психиатриялық сараптамадан өтті. Атырау облысының прокуратурасы оның нәтижелерін жариялап, әйелге қатысты тергеудің қазіргі мәртебесін түсіндірді.

Жангелдин ауылындағы төрт адамды өлтіру ісін қарау барысында Ақбаян Мұқанғалиеваның есімі бірнеше рет аталды. Ол айыпталушы Сұлтан Сәрсемалиевтің бұрынғы жұбайы әрі оның балаларының анасы.

Атырау облысы прокуратурасының редакцияға берген жауабында Алматыда жүргізілген стационарлық кешенді сот-психологиялық және психиатриялық сараптама қорытындысы бойынша мамандар Ақбаян Мұқанғалиеваға әрі қарай бақылау қажет екенін атап өткен.

- Алматыда жүргізілген стационарлық кешенді сот-психологиялық және психиатриялық сараптама қорытындысына сәйкес, Ақбаян Мұқанғалиеваға динамикалық бақылау мен қосымша диагностика қажет екені анықталды, – деп хабарлады прокуратура.

Сонымен қатар ведомство оның процессуалдық мәртебесіне тоқталды. Мәлімет бойынша, 2026 жылғы 27 сәуірде Мұқанғалиеваға қатысты ҚР ҚК 99-бабының 2-бөлігінің 1-тармағы бойынша қозғалған іс қылмыс құрамының болмауына байланысты тоқтатылған.

Алайда оған қатысты тергеу толық аяқталған жоқ. Негізгі қылмыстық істен бөлек, ҚР ҚК‑нің 434-бабы («Қылмыс туралы хабарламау») бойынша жеке іс қозғалған.

Прокуратураның мәліметінше, Ақбаян Мұқанғалиеваның әрекеттеріне түпкілікті құқықтық баға әзірге берілген жоқ. Сондай-ақ оған қатысты ешқандай бұлтартпау шарасы қолданылмаған.

Прокуратураның мәліметінше, қылмыстық қудалау органы істің мән-жайын жан-жақты, толық әрі объективті зерттеу үшін барлық қажетті шараларды қабылдап жатыр. Жүргізілген тергеу әрекеттерінің нәтижесі бойынша түпкілікті процессуалдық шешім қабылданады.

Сонымен қатар ведомство ҚР ҚПК‑нің 201-бабына сәйкес, досудьялық тергеудің өзге деректері тергеу мүддесіне орай жария етілмейтінін еске салды.

Атырау облысының қылмыстық істер жөніндегі мамандандырылған сотында Сұлтан Сәрсемалиевке қатысты істі қарау жалғасуда. Ол бұрынғы жұбайының төрт туысын өлтірді деп айыпталуда. Сот отырыстары барысында трагедияға дейінгі және одан кейінгі оқиғаларда Ақбаян Мұқанғалиеваның есімі бірнеше рет аталған еді.

Айгүл МАНСУРОВА

Бүгін, 19:09